Mýrdælingar óhressir með sinn auðkýfing

Einar Freyr Elínarsson oddviti Mýrdalshrepps er óhress með framgöngu svissneska auðkýfingsins Rudolps Walthers Lamprechts, í sinni sveit. Lamprecht keypti Heiðardalinn, jörð sem telst mikil náttúruperla en hann hefur haft tilburði í þá átt að meina mönnum að fara þar um sín lönd. Skilti sem sett hefur verið upp að undirlagi Lamprechts fer fyrir brjóst oddvitans og vill hann að þær merkingar verði umsvifalaust teknar niður. Bændablaðið greindi frá þessu í morgun.

Vegagerðin dregur lappirnar

Einar Freyr segir, í samtali við Vísi, að hann bíði nú eftir svari við erindi sínu til Vegagerðarinnar, það er endanlegu svari, en oddvitinn hefur beint þeim tilmælum til Vegagerðarinnar að láti til sín taka og fjarlægi merkingarnar.

„Þeir töldu þetta ekki vera á sinni könnu vegna þess að vegurinn var tekinn af vegaskrá 2013. Þrátt fyrir mótmæli sveitarstjórnar,“ segir Einar Freyr. Ef Vegagerðin vill draga lappirnar í málinu mun Einar Freyr næst snúa sér til lögreglu með málið.

„Þarna er gömul þjóðleið í gegnum Heiðardalinn. Mýrdalshreppur á land þar fyrir innan, inni á heiðum. Ég er ekki tilbúinn að una þeim skilaboðum að þarna megi ekki fara um,“ segir Einar Freyr.

Sagði eitt en gerir annað

Vísir birti athyglisvert viðtal við Lamprecht í febrúar árið 2013 sem oddvitinn segir athyglisvert fyrir margra hluta sakir.

„Þar talar hann meðal annars um að allir séu velkomnir að fara um hans land, gerir engar athugasemdir um það. Talar að vísu um einhverja freka íslenska jeppakalla sem vaða yfir allt, en þessi skilti eru athyglisverð í ljósi þeirra ummæla.“

Einar Freyr vill meina að allt annað hafi komið uppúr dúrnum og þó ekki sé beinlínis hægt að tala um urg í Mýrdalshreppi vegna Svisslendingsins, þá sé óhætt að segja að þar hafi menn orðið fyrir vonbrigðum því ekkert hefur orðið úr frómum fyrirheitum hins auðuga Lamprechts sem hafði uppi orð um talsverða uppbyggingu í byggðarlaginu, svo sem þeirri að koma upp fiskeldi þar sem ekkert hefur orðið af.

Ömurleg skilaboð

„Ég held að óhætt sé að segja að menn séu vonsviknir að ekkert hafi gengið eftir um uppbyggingaráform. Og margir eru ósáttir við þessar merkingar. Og þá þau skilaboð sem þessar merkingar gefa. Flestir sveitunga minna virða þessar merkingar að vettugi en þessi skilaboð eru leiðinleg. Þetta er prinsippmál.“

En, samkvæmt fornum lögum er landeigendum það ekki heimilt að meina mönnum að fara um lönd sín. Gætir þú ekki sem oddviti tekið þessi skilti niður?

„Ég veit ekki hversu vel færi á því ef ég mætti þarna sjálfur á traktornum og kippti þessu upp. En ég er sannarlega að beita mér í málinu.“

Einar Freyr segir að Rudolph Lamprecht hafi látið planta trjám í landi sínu og rifið hús sem þarna voru. Þar standi nú aðeins sumarhús auðkýfingsins. Oddvitinn bendir á að þegar Lamprecht keypti jörðina hafi aðstæður verið aðrar og jarðar á undirverði, uppúr aldamótum. Landslagið er öðru vísi nú á fasteignamarkaði á Suðurlandi en þar hefur orðið sprenging, mest fjölgun íbúa á landinu öllu sé litið til höfðatölu, nokkuð sem fylgt hefur auknum straumi ferðamanna um svæðið.