Ferðamönnum brá er þeir keyrðu fram á risastórt búrhvalshræ

Þeim brá heldur betur í brún tveimur ferðamönnum frá Bandaríkjunum sem höfðu pantað sér ferð hjá Black Beach Tours og keyrðu fram á risastórt búrhvalshræ á fjórhjólum sínum.

Einar Guðbjartsson, fararstjóri Ameríkananna, segir að þeir hafi lent í dag og samhliða því að þeim hafi brugðið hafi þeir orðið harla glaðir því þetta er ævintýraleg sýn, eins og myndirnar bera með sér.

Einar þekkir sig vel á þessum slóðum og segir þetta einstaka sýn. Hann hafi í það minnsta aldrei séð neitt í líkingu við þetta. „Það var enginn fnykur af honum þannig að þetta hefur sennilega gerst í morgun eða í gær,“ segir Einar sem giskar á að hvalurinn vegi um 30 tonn.

Hvalurinn liggur í fjörunni fáeinum kílómetrum austur af Þorlákshöfn, steinsnar frá veitingahúsinu Bláa hafið.