Ný ríkis­stjórn tekur við í Perú eftir storma­sama viku

Ný ríkisstjórn tók við völdum í Perú í gær eftir stormasama viku í stjórnmálalífi landsins. Athöfnin átti sér stað í forsetahöllinni í Líma, höfuðborg landsins.

Martín Vizcarra, forseti Perú, leysti upp þing landsins á mánudag en pólitískir andstæðingar forsetans höfðu þar meirihluta. Forsetinn hefur lengi sakað þingið um að standa í vegi fyrir að tekið verði almennilega á spillingu í landinu og leggja stein í götu spillingarrannsókna yfirvalda.

Á sama tíma og ný ríkisstjórn tók við var tilkynnt að boðað hafi verið til þingkosninga í landinu þann 26. janúar næstkomandi.

Þrír af fyrrverandi forsetum landsins eru nú til rannsóknar vegna ásakana um spillingu. Sá fjórði, Alan Garcia, fyrirfór sér í apríl síðastliðinn þegar til stóð að handtaka hann vegna gruns um að hann hafði gerst sekur um spillingu.

Vicente Zeballos er nýr forsætisráðherra landsins. Hann hefur áður gegnt embætti dómsmálaráðherra.