Jón Dagur skoraði í tapi

Jón Dagur Þorsteinsson skoraði fyrir Århus í tapi fyrir FC Kaupmannahöfn í dönsku úrvalsdeildinni í fótbolta í dag.

Dame N'Doye kom gestunum frá Kaupmannahöfn yfir á 17. mínútu og skildi mark hans liðin að í hálfleik. Hann var svo aftur á skotskónum í upphafi seinni hálfleiks.

Jón Dagur, sem var í byrjunarliði Århus, skoraði fyrir heimamenn á 56. mínútu með laglegu marki, vippaði boltanum í netið.

Heimamenn komust þó ekki nær og þurftu að sætta sig við 2-1 tap fyrir FCK.

FCK er í öðru sæti deildarinnar, fjórum stigum á eftir toppliði Midtjylland. Århus er í sjötta sæti með 20 stig.