Fyrsta danska þrennan í ítölsku úrvalsdeildinni í 55 ár

Danski landsliðsmaðurinn Andreas Cornelius skoraði þrennu þegar Parma vann 5-1 sigur á Genoa í ítölsku úrvalsdeildinni í gær.

Cornelius kom inn á sem varamaður á 12. mínútu. Þremur mínútum fyrir hálfleik kom hann Parma í 2-0. Hann skoraði aftur í uppbótartíma fyrri hálfleiks og á 50. mínútu gerði hann svo sitt þriðja mark.

Þetta var ekki bara fyrsta þrenna Cornelius í ítölsku úrvalsdeildinni heldur fyrsta þrenna dansks leikmanns í deildinni í 55 ár.

Síðasti Daninn sem skoraði þrjú mörk í einum og sama leiknum í efstu deild á Ítalíu var Harald Nielsen. Hann skoraði þrennu í 4-0 sigri Bologna á Roma 19. janúar 1964.

- Andreas Cornelius is the first player from Denmark to score a Serie A hat-trick since Harald Nielsen in Bologna's 4-0 home win over AS Roma on 19 January 1964. #ParmaGenoa#SerieATIM

— Gracenote Live (@GracenoteLive) October 20, 2019

Nielsen skoraði alls 21 mark þegar Bologna varð ítalskur meistari tímabilið 1963-64. Hann lék einnig með Inter, Napoli og Sampdoria á Ítalíu. Nielsen lést fyrir fjórum árum síðan.

Cornelius hefur skorað fjögur mörk fyrir Parma í sjö leikjum í ítölsku úrvalsdeildinni í vetur.

Sigurinn í gær var sá stærsti hjá Parma í ítölsku úrvalsdeildinni í 18 ár, eða síðan liðið vann Perugia, 5-0, í febrúar 2001.