Sondland sagðist fara eftir skipunum Trump

Gordon Sondland, sendiherra Bandaríkjanna gagnvart Evrópusambandinu, sagðist fara eftir skipunum Donald Trump, forseta, þegar hann beitti yfirvöld Úkraínu þrýstingi. Markmiðið var að reyna að fá Úkraínumenn til að hefja tvær rannsóknir sem myndu nýtast Trump í baráttu hans fyrir forsetakosningarnar á næsta ári. Þetta sagði Tim Morrison, fyrrverandi meðlimur þjóðaröryggisráðs Hvíta hússins, í samtali við þingmenn fulltrúadeildarinnar sem rannsaka nú hvort Trump hafi brotið af sér í starfi vegna áðurnefnds þrýstings.

Hann sagði þar að auki að Sondland hafi verið í reglulegum samskiptum við Trump, samkvæmt AP fréttaveitunni.



Fulltrúadeildin opinberaði vitnisburð Morrison nú í kvöld.



Vitni hafa sagt að Úkraínumenn hefðu ekki fengið aðstoðina fyrr en Volodymir Zelensky, forseti Úkraínu, lýsti því yfir opinberlega að áðurnefndar rannsóknir væru hafnar. Önnur rannsóknin sem Trump vildi átti að beinast að Joe Biden og hin snýr að stoðlausri samsæriskenningu um forsetakosningarnar 2016. Nánar er fjallað um það hér neðar.

Sjá einnig: Sluppu með naumindum við að verða við kröfum Trump



Morrison sagði þingmönnum að hann hefði lagt til að aðgangur að upplýsingum um umdeilt símtal á milli Trump og Zelensky yrðu takmarkaðar. Hann óttaðist að eitthvað um símtalið myndi leka í fjölmiðla og sagði þar að auki að um leið og hann hafi heyrt símtalið hafi hann vitað að nauðsynlegt væri að hylja það

Þrátt fyrir það sagðist Morrison ekki hafa heyrt neitt í símtalinu sem hægt væri að telja óviðeigandi. Hann sagði þar að auki að það hefðu verið mistök að flytja upplýsingar um símtalið af vefþjóni sem geymir iðulega slík gögn, yfir á vefþjón sem geymir leynileg gögn.

Símtalið , sem átti sér stað 25. júlí, leiddi á endanum til þess að uppljóstrari lagði fram formlega kvörtun vegna þess. Í kjölfar þess hófst svo rannsókn fulltrúadeildarinnar á meintum brotum forsetans. Aðrir starfsmenn Hvíta hússins kvörtuðu einnig yfir símtalinu, þar sem Trump þrýsti á Zelensky að hefja áðurnefndar rannsóknir.

Sjá einnig: „Allt hvíldi á rannsóknum“

Morrison sagðist einnig hafa verið á fundi Sondland með aðstoðarmanni Zelensky í Póllandi þann 1. september þar sem Sondland sagði berum orðum að það myndi „hjálpa til“ við afhendingu aðstoðarinnar að tilvist rannsóknanna yrði tilkynnt opinberlega. Morrison sagði það í fyrsta sinn sem hann hafi heyrt slíkt.

Það hafi valdið honum áhyggjum að vera að draga Úkraínumenn inn í bandarísk stjórnmál.

Vitnisburður Morrison gæti komið Sondland í bobba en þingmenn hafa velt því fyrir sér hvort hann hafi logið að þeim þegar hann var yfirheyrður. Hann mun mæta aftur á þingið í næstu viku og svara spurningum þingmanna á opnum fundi.

Byggja á samsæriskenningum

Forsetinn og bandamenn hans hafa sakað Joe Biden um spillingu vegna þess að hann þrýsti á úkraínsk stjórnvöld að reka saksóknara á sama tíma og Hunter, sonur hans, sat í stjórn olíufyrirtækisins. Það eigi Biden að hafa gert til að stöðva rannsókn sem beindist að Burisma, samkvæmt kenningu Trump-liða og vill forsetinn að Úkraínumenn rannsaki það.

Ekkert hefur þó komið fram sem bendir til þess að Biden-feðgarnir hafi gert nokkuð ólöglega eða að rannsókn hafi yfir höfuð staðið yfir á Burisma á þeim tíma sem þáverandi varaforsetinn reyndi að koma saksóknara frá. Sú viðleitni var hluti af alþjóðlegum þrýstingi þar sem vestræn ríki töldu saksóknarann ljón í vegi þess að uppræta langvarandi spillingu í Úkraínu.

Hin rannsóknin tengist samsæriskenningu um tölvupóstþjón landsnefndar Demókrataflokksins sem rússneskir hakkarar brutust inn í fyrir forsetakosningarnar 2016 og láku vandræðalegum póstum í gegnum Wikileaks. Trump hefur lengi verið gramur vegna niðurstöðu bandarísku leyniþjónustunnar að rússnesk stjórnvöld hafi háð upplýsingastríð og framið tölvuinnbrot til að hjálpa honum til sigurs.

Trump og bandamenn hans hafa því haldið þeirri hugmynd á lofti um að það hafi í reynd verið úkraínskir útsendarar sem frömdu innbrotið í tölvupóstþjón demókrata og að þeir hafi bókstaflega falið áþreifanlegan tölvupóstþjón í Úkraínu. Markmiðið hafi verið að koma sök á Rússa.

Hugmyndin grundvallast meðal annars á þeirri ranghugmynd að Crowdstrike, tölvuöryggisfyrirtæki frá Kaliforníu sem rannsakaði tölvuinnbrotið, hafi í raun verið í eigu úkraínsks auðkýfings. Crowdstrike, og alríkislögreglan FBI, komust að því að rússneskir hakkarar hefðu staðið að innbrotinu. Trump nefndi Crowdstrike sérstaklega á nafn í símtali sínu við Zelensky í júlí. Tölvupóstþjónn demókrata sem brotist var inn í var heldur ekki eitt áþreifanleg tæki eins og kenningin byggir á heldur skýþjónusta.