Einar Andri hættir með Aftureldingu eftir tímabilið

Einar Andri Einarsson lætur af störfum sem þjálfari Aftureldingar þegar samningur hans við félagið rennur út eftir tímabilið.

Þetta staðfesti Einar Andri í samtali við Vísi í dag. Hann tilkynnti stjórnarmönnum Aftureldingar um ákvörðun sína fyrr í vikunni.

„Þetta er sjötta tímabilið mitt hjá Aftureldingu og ég tel að það sé kominn tími á breytingar. Þetta hefur verið frábær tími og frábært að vinna fyrir Aftureldingu. Markmiðið er að klára tímabilið af krafti,“ sagði Einar Andri.

Hann tók við Aftureldingu sumarið 2014. Á hans fyrsta tímabili við stjórnvölinn komst Afturelding, sem var þá nýliði, í úrslit um Íslandsmeistaratitilinn í fyrsta sinn í 16 ár. Í úrslitunum töpuðu Mosfellingar fyrir Haukum, 3-0.

Tímabilið 2015-16 komst Afturelding aftur í úrslitaeinvígið en tapaði aftur fyrir Haukum, 3-2.

Á þriðja tímabili Einars Andra komst Afturelding í bikarúrslit í fyrsta sinn í 14 ár. Liðið laut þar í lægra haldi fyrir Val, 26-22.

Á síðasta tímabili lenti Afturelding í 6. sæti Olís-deildar karla og féll úr leik fyrir Val, 2-0, í 8-liða úrslitum úrslitakeppninnar.

Áður en Einar Andri tók við Aftureldingu var hann þjálfari FH í fimm ár. Undir stjórn hans og Kristjáns Arasonar urðu FH-ingar Íslandsmeistarar 2011.

Afturelding er í 2. sæti Olís-deildar karla með 17 stig, tveimur stigum á eftir toppliði Hauka. Mosfellingar mæta KA-mönnum fyrir norðan á morgun.