Fann ódýrasta flugfar heims á fyrsta farrými

Flugáhugamaðurinn Ben Harris hefur oftar en ekki kannað verð á flugmiðum og fann hann á dögunum til að mynda ódýrustu flugferðir heims. Í nýjasta myndbandi hans fer hann aftur á móti í rannsóknarvinnu og gluggar í verðmiða á flugmiðum á fyrsta farrými.

Verkefnið var það að finna ódýrustu flugmiðana á fyrsta farrými og það gæti vakið töluverða athygli lesenda. Það langar sennilega marga að ferðast á fyrsta farrými.

Harris fór því í mikla rannsóknarvinnu og fann nokkuð fínt verð á flugferð með fyrsta farrými. Flugfélagið Lufthansa er með ódýrasta flugið frá München til New York og það á fyrsta farrými.

Harris fer yfir ferðlagið frá a-ö. Alveg frá innritun þar til hann lenti á áfangastaðnum. Flugið kostaði Harris 1500 pund, aðra leið.

Það mun vera um 240 þúsund krónur íslenskar. Harris setti sér alltaf það markmið að fljúga aðeins á fyrsta farrými í hæsta gæðaflokki. Skilyrðin voru að hægt væri að sofa í rúmi. Oftast kosta slík flug um 5500 pund eða um 877 þúsund krónur aðra leið.