Felur ríkislögreglustjóra að skoða viðmiðin eftir frásögn lögreglukonu

Dómsmálaráðherra hyggst beina því til embættis ríkislögreglustjóra að skoða þau viðmið sem stuðst er við varðandi inngöngu í starfsnám í lögreglufræðum við Háskólann á Akureyri. Ráðherra vísar í umfjöllun Vísis um lögreglukonu sem fékk ekki að halda áfram í náminu vegna þess að hún tekur inn kvíðalyfið sertral.

Lögreglunámið fer fram með þeim hætti að á vormisseri 1. árs hefst starfsnám. Sækja þarf sérstaklega um inngöngu í starfsnámið og gangast undir sérstök hæfnispróf. Trúnaðarlæknir lögreglunnar tekur jafnframt við læknisfræðilegum gögnum við umsókn og metur hvort nemar standist þær kröfur sem gerðar eru um líkamlegt og andlegt heilbrigði til að geta hafið starfsnám.

Samkvæmt upplýsingum á vef MSL getur saga umsækjanda um kvíðaraskanir verið útilokandi til starfsnámsins. Það dragi verulega úr líkum á því að viðkomandi geti stundað námið með fullnægjandi hætti. Einstaklingar sem þarfnast meðferðar með lyfjum sem hafa „sefjandi áhrif á miðtaugakerfi“ eru einnig útilokaðir frá námi. 

Sú reyndist raunin í tilfelli Ólafíu Kristínar Norðfjörð, sem iðulega er kölluð Lóa. Hún hefur verið starfandi lögreglukona síðan 1. febrúar síðastliðinn og samhliða því stundað nám í lögreglufræðum við HA frá því í haust. Hún lýsti því í samtali við Vísi að henni hefði verið synjað um inngöngu í starfsnámið á grundvelli þess að hún hafi tekið inn kvíðalyfið sertral þegar hún skilaði umsókninni. Lóu þótti þetta skjóta skökku við, sérstaklega í ljósi vitundarvakningar í samfélaginu um geðheilbrigði – og þess að hún hafði þegar starfað sem lögreglukona svo mánuðum skipti.

Áslaug Arna Sigurbjörnsdóttir dómsmálaráðherra greinir frá því í pistli á Facebook-síðu sinni í dag að hún hyggist beina því til ríkislögreglustjóra að skoða þessi viðmið. Áslaug Arna segir að viðmiðin verði að setja í nútímalegra horf.

„Mikil vitundavakning hefur átt sér stað í samfélaginu hvað varðar andleg veikindi á borð við þunglyndi og kvíða. Stigin hafa verið mörg framfaraskref í að auka þjónustu og bjóða upp á fjölbreyttari úrræði til að grípa fólk á fyrsta stigi vandans. Það að þurfa að notast við lyf á einhverjum tímapunkti má ekki verða til þess að viðkomandi njóti ekki sömu tækifæra og aðrir þegar kemur að menntun eða atvinnu,“ skrifar Áslaug, sem sjálf hefur starfað sem lögreglukona.

Þá megi ekki gleyma því að löggæslustarfið breytist hratt með nýjum áskorunum og fjölbreytni í greininni enn mikilvægari en áður.

„Hér verður að gæta sanngirni. Umsækjendur eiga rétt á einstaklingsbundnu mati hverju sinni. Á það jafnt við hvort lyf séu tekin við kvíða eða þunglyndi, ADHD eða sykursýki, svo dæmi séu nefnd.“

Ólafur Örn Bragason forstöðumaður Mennta- og starfsþróunarseturs lögreglunnar sem sér um námið sagði í samtali við Vísi í fyrradag að umsóknarferlið væri samkvæmt lögreglulögum, sem og samkvæmt samnorrænum viðmiðum. Þá lagði hann áherslu á að einstaklingur sem fengi synjun um inngöngu í starfsnámið á áðurnefndum grundvelli væri ekki útilokaður frá náminu heldur gæti hann sótt um síðar.

Rætt var við Áslaugu Örnu um málið í Reykjavík síðdegis á Bylgjunni. Hlusta má á viðtalið hér fyrir neðan.