Hætta við að hefja æfingar að nýju í dag

Spænska úrvalsdeildarfélagið Real Sociedad hefur skyndilega hætt við áform sín um að hefja æfingar að nýju í dag.

Real Sociedad gaf það út í gær að aðallið félagsins myndi koma aftur saman til æfinga í dag og verða þar með fyrsta spænska liðið til að hefja skipulagðar hópæfingar eftir að útgöngubann var sett á, á Spáni.

Mætti þessi ákvörðun mikilli andstöðu á Spáni og hefur félagið nú gefið út að það muni ekki hefja æfingar í dag heldur muni leikmenn þess halda áfram að æfa heima hjá sér. Kemur fram í tilkynningu félagsins að þessi ákvörðun sé tekin eftir samtal við heilbrigðisyfirvöld.

Spánverjar hafa ekki farið varhluta af kórónaveirufaraldrinum og hefur strangt útgöngubann verið í gildi þar undanfarnar vikur. Til stendur að létta á því að örlitu leyti í dag en smitum hefur fækkað þar í landi að undanförnu.