Bush á meðal repúblikana sem ætla ekki að kjósa Trump

Nokkrir áhrifamenn í Repúblikanaflokknum ætla annað hvort ekki að kjósa Donald Trump í forsetakosningunum í haust eða jafnvel greiða Joe Biden, frambjóðanda demókrata, atkvæði sitt. George W. Bush, fyrrverandi forseti, er á meðal þeirra sem ætlar ekki að styðja Trump til endurkjörs.

Eftir að Trump tryggði sér útnefningu Repúblikanaflokksins og vann sigur í kosningunum árið 2016 þögnuðu nær allar gagnrýnisraddir sem heyrðust innan flokksins þegar framboð raunveruleikastjörnunnar var ekki tekið alvarlega.

Sem forseti hefur Trump nánast ekki mætt neinu andófi innan eigin flokks jafnvel þegar hann hefur þótt brjóta gegn gamalgrónum hefðum og venjum um hegðun forseta. Repúblikanar sem voru ósammála Trump hafa ýmist fylkt sér að baki honum eða hætt á þingi frekar en að þurfa að þola formælingar forsetans á samfélagmiðlum og kosningafundum.

Þannig hafa þingmenn repúblikana að miklu leyti setið hljóðir undir furðulegustu uppákomum forsetatíðar Trump eins og þegar forsetinn þráaðist við að fordæma nýnasista og hvíta þjóðernissinna eftir óeirðir í Charlottesville árið 2017 og hann tók orð Vladímírs Pútín Rússlandsforseta fram yfir bandarísku leyniþjónustuna á fundi þeirra árið 2018.

Nú segir New York Times hins vegar að nokkrir nafntogaðir repúblikanar glími við hversu langt þeir eigi að ganga í að upplýsa um að þeir ætli ekki að styðja Trump til endurkjörs í nóvember. Sumir eru jafnvel sagðir ætla að greiða Joe Biden, fyrrverandi varaforseta og forsetaefni demókrata, atkvæði sitt.

Viðbrögð við mótmælum og faraldurinn auka á áhyggjurnar

Atburðir undanfarinna vikna eru sagðar hafa aukið áhyggjur þeirra um hæfni Trump til að gegna embætti forseta. Trump hefur hóta að beita hernum til að kveða niður mótmæli gegn lögregluofbeldi og kynþáttahyggju og er sakaður um að hafa klúðrað viðbrögðum alríkisstjórnarinnar við kórónuveirufaraldrinum.

Bush ætlar ekki að kjósa Trump og bróðir hans Jeb Bush, fyrrverandi ríkisstjóri á Flórída og frambjóðandi í forvali repúblikana árið 2016, er ekki viss um hvernig hann ætlar að kjósa. Mitt Romney, öldungadeildarþingmaður frá Utah og forsetaframbjóðandi repúblikana árið 2012, ætlar heldur ekki að kjósa Trump. Romney var eini repúblikaninn sem greiddi atkvæði með því að Trump yrði sakfelldur fyrir embættisbrot í þinginu í vetur.

Cindy McCain, ekkja Johns McCain öldungadeildarþingmanns, er sögð ætla að greiða Biden atkvæði sitt nær örugglega en óviss um hvort hún eigi að lýsa því yfir opinberlega vegna þess að sonur hennar hyggur á framboð. Trump hefur haldið áfram að níða McCain jafnvel eftir að hann lést úr krabbameini í fyrra.

Ekkert þeirra greiddi Trump þó atkvæði sitt heldur árið 2016. Andstaða þeirra nú er hins vegar talin geta vegið þyngra þar sem að þessu sinni reyna repúblikanar að halda forsetaembættinu og völdum í öldungadeild þingsins.

Colin Powell, fyrrverandi utanríkisráðherra í ríkisstjórn Bush og formaður herforingjaráðs Bandaríkjanna,  varð fyrsti þekkti repúblikaninn til þess að lýsa formlega yfir stuðningi við Biden í sjónvarpsviðtali í dag.

Fleiri repúblikanar hafa lýst miklum efasemdum um Trump undanfarið. Lisa Murkowski, öldungadeildarþingmaður flokksins frá Alaska, lýsti sig sammála harðorðri yfirlýsingu James Mattis, fyrrverandi varnarmálaráðherra Trump, í síðustu viku. Mattis sakaði Trump um að ala á sundrung og ýjaði að því að hann virti ekki stjórnarskrá Bandaríkjanna eftir forsetinn lét rýma torg af mótmælendum við Hvíta húsið á mánudag til þess að hann gæti látið taka myndir af sér við kirkju.

Murkowski sagðist „vandræðast“ með hvort hún ætlaði að kjósa Trump í haust. Fyrir vikið uppskar Murkowski reiði Trump sem tísti um að hann ætlaði sér að berjast gegn endurkjöri hennar á þing eftir tvö ár.

Á hinn bóginn nýtur Trump stuðnings mun fleiri kjörinna fulltrúa nú sem forseti en hann gerði fyrir kosningarnar fyrir fjórum árum, þar á meðal einarðs stuðnings forystusveitar Repúblikanaflokksins á þingi.

Fréttin hefur verið uppfærð.