Hannes Hólmsteinn segir Þorvald bitran andstæðing Sjálfstæðisflokksins

Hannes Hólmsteinn Gissurarson prófessor segir kollega sinn við Háskóla Íslands, Þorvald Gylfason, vilja gefa af sér þá mynd að hann sé hlutlaus fræðimaður en það sé fjarri sanni.

Hannes blandar sér í umræðuna um mál Þorvaldar en eins og Vísir auk flestra fjölmiðla landsins hafa greint frá lagði fulltrúi fjármálaráðuneytisins stein í götu Þorvaldar varðandi skipan hans sem ritstjóra norræns fræðirits.

Hannes skrifar stutta færslu á Facebooksíðu sína, skrifar hana á ensku, þar sem hann gefur lítið fyrir málstað Þorvaldar. 

Hann segir Þorvald vilja gefa af sér þá mynd á erlendum vettvangi að hann sé hlutlaus fræðimaður. En það sé af og frá. Hannes birtir mynd af Þorvaldi þar sem hann veitir verðlaunum viðtöku, verðlaunum sem Hannes segir að séu sérstök verðlaun sósíalistahreyfingar; á vegum ungra sósíalista árið 2007.

Þorvaldur hefur verið óþreytandi baráttumaður fyrir aukinni skattheimtu, þjóðnýtingu fiskimiða og bitur andstæðingur Sjálfstæðisflokksins, sem að sögn Hannesar er frjálslyndur íhaldsflokkur, sá stærsti landsins.