Skemmdi hraðbanka sem gleypti kortið hans

Lögreglan á höfuðborgarsvæðinu þurfti að hafa afskipti af manni í morgun, sem skemmdi hraðbanka í miðborginni. Sá sagðist hafa misst stjórn á sér þegar hraðbankinn gleypti kortið hans. Þá var nokkuð um tilkynningar um ölvað fólk sem var til vandræða en samkvæmt dagbók lögreglu voru flestir farnir þegar lögregluþjónar komu á vettvang.

Einnig voru höfð afskipti af ökumanni í Hafnarfirði í morgun en sá er grunaður um akstur undir áhrifum áfengis og fíkniefna. Þar að auki var hann á ótryggðum bíl.

Tvisvar sinnum í dag var óskað eftir aðstoð lögreglu vegna þjófnaðar í matvöruverslunum.