Zlatan færist nær því að verða samherji Arons

Samningur Zlatan Ibrahimovic við ítalska stórliðið, AC Milan, rennur út í sumar og óvíst er hvað sá sænski gerir eftir þessa leiktíð.

Samkvæmt Sky Sports á Ítalíu bendir þó allt til þess að hann verði ekki áfram á Ítalíu og gæti mögulega verið á leið til heimalandsins, Svíþjóðar.

Þar ku leiðin liggja til Hammarby en framherjinn skrautlegi keypti sig inn í félagið í nóvember á síðasta ári. Hann æfði m.a. með liðinu er hann var í Svíþjóð á tímum kórónuveirunnar.

Aron Jóhannsson leikur með liðinu og hefur gert undanfarið ár en Zlatan hefur skorað fjögur mörk í þeim ellefu leikjum sem hann hefur spilað í með Milan frá því að hann kom til félagsins í janúar.