Rússar hökkuðu fyrirtæki sem tengist kæru þingsins gegn Trump

Tölvuþrjótar á vegum rússnesku leyniþjónustunnar brutust inn í tölvukerfi úkraínska gasfyrirtækisins Burisma sem hefur verið í miðpunkti kæruferlis Bandaríkjaþings gegn Donald Trump Bandaríkjaforseta vegna embættisbrota. Hvorki liggur fyrir hvað þrjótarnir komust yfir né eftir hverju þeir sóttust.

Burisma hefur verið ofarlega á baugi í bandarískum stjórnmálum undanfarin misseri. Trump og bandamenn hans hafa án sannana sakað Joe Biden, fyrrverandi varaforseta og mögulegan mótherja forsetans í kosningum síðar á þessu ári, um spillingu í Úkraínu í tengslum við að sonur hans, Hunter Biden, sat í stjórn fyrirtækisins.

Trump og fulltrúar hans beittu úkraínsk stjórnvöld þrýstingi til að rannsaka Burisma og Biden auk stoðlausrar samsæriskenningar um meint afskipti Úkraínu af forsetakosningunum í Bandaríkjunum árið 2016. Fulltrúadeild Bandaríkjaþings kærði Trump fyrir embættisbrot í desember og sakaði hann um að hafa misbeitt valdi sínu í þrýstingsherferðinni gegn Úkraínu.

New York Times segir að rússneskir hakkarar á vegum GRU, leyniþjónustu rússneska hersins, hafi byrjað tilraunir til að brjótast inn í tölvukerfi Burisma snemma í nóvember en þá var fjölmiðlafár í Bandaríkjunum yfir rannsókn þingsins á meintum embættisbrotum Trump.

Sérfræðingar eru sagðir telja að tímasetning og umfang tölvuárása Rússa á fyrirtækið bendi til þess að þeir hafi leitað að mögulega vandræðalegum upplýsingum um Biden-feðgana, svipuðum þeim og Trump sóttist eftir frá úkraínskum stjórnvöldum í fyrra.

Sömu aðferðir og í innbrotunum 2016

Aðferðir tölvuþrjótanna eru sagðar líkjast þeim sem voru notaðar til að brjótast inn í tölvupósta landsnefndar Demókrataflokksins og forsetaframboðs Hillary Clinton árið 2016. Rússar dreifðu tölvupóstum úr ránsfengnum meðal annars í gegnum uppljóstranavefinn Wikileaks og vef nettrölla og svonefndra botta.

Í báðum tilfellum notuðu Rússarnir svonefndar vefveiðar (e. Phishing) til að stela notendanöfnum og lykilorðum Burisma. Þeir stofnuðu falsaðar vefsíður sem voru látnar líta út fyrir að tengjast Burisma og sendu svo falstölvupósta á starfsmenn til að fá þá til að skrá notendaupplýsingar sínar inn á vefsíðurnar.

Bandaríska tölvuöryggisfyrirtækið Area 1 segir að hakkararnir hafi tekist að blekkja einhverja starfsmenn Burisma til að fá þeim notendaupplýsingar sínar með þessum hætti.

New York Times segir að samhliða þessum tilraunum rússnesku leyniþjónustunnar hafi njósnarar hennar reynt að hafa uppi á skaðlegum upplýsingum um Biden-feðgana í Úkraínu. Þeir reynir að komast yfir tölvupósta, fjármálaupplýsinga og lagaleg skjöl, að sögn heimildarmanns blaðsins innan bandarísku ríkisstjórnarinnar.

Bandaríska leyniþjónustan komst að þeirri niðurstöðu að rússnesk stjórnvöld hefðu reynt að hafa áhrif á forsetakosningarnar árið 2016, meðal annars með tölvuinnbrotinu hjá demókrötum og svonefndri tröllaverksmiðju sem dældi út fölskum áróðri sem var beint að bandarískum kjósendum. Vladímír Pútín, forseti, hafi skipað fyrir um afskiptin sem áttu að hjálpa Trump að ná kjöri. Sjö liðsmenn úkraínsku leyniþjónustunnar voru ákærðir í Bandaríkjunum vegna þess.

Varað hefur verið við því að Rússar hyggi á frekari afskipti af forsetakosningunum sem fara fram í nóvember á þessu ári. Forval Demókrataflokksins til að velja forsetaframbjóðanda hefst mánudaginn 3. febrúar og hefur Biden alla jafna mælst með mesta stuðning frambjóðenda í skoðanakönnunum.