Ólafur Örn nýr að­stoðar­for­stjóri Opinna kerfa

Ólafur Örn Nielsen hefur verið ráðinn aðstoðarforstjóri Opinna kerfa.

Í tilkynningu frá fyrirtækinu kemur fram að á síðastliðnu ári hafi nýir fjárfestar komið að félaginu og Ragnheiður H. Harðardóttir tók við sem forstjóri þess.

Undanfarna mánuði hafi verið unnið að mótun á stefnu félagsins til framtíðar og sé ráðning Ólafs liður í því að styðja við skipulagsbreytingar sem felast í því að Opin kerfi geti unnið í enn nánara samstarfi við fyrirtæki um rekstur upplýsingatæknimála.

„Ólafur hefur starfað á sviði upplýsingatækni í 15 ár við hugbúnaðarþróun, markaðsmál, stjórnun og rekstur fyrirtækja. Hann hefur síðustu misseri starfað sem stjórnunarráðgjafi með áherslu á stefnumótun og stafræna framtíð fyrirtækja. Ólafur var framkvæmdastjóri hugbúnaðar- og ráðgjafafyrirtækisins Kolibri á árunum 2015-2019 en þar áður kom hann að stofnun hönnunarfyrirtækisins Form5. Þar áður var hann vefmarkaðsstjóri WOW air og hugbúnaðarsérfræðingur hjá mbl.is. Þá hefur Ólafur setið í stjórnum samtaka upplýsingatæknifyrirtækja og ÍMARK, félags markaðsfólks á Íslandi,“ segir í tilkynningunni.