Vont korter á þjálfaraferli Snorra Steins: Finnur ristarbrotinn

Valsmaðurinn Finnur Ingi Stefánsson ristarbrotnaði í leiknum á móti Aftureldingu í síðustu umferð Olís deildar karla. Valsliðið missti því tvo sterka leikmenn í þessari viku.

Finnur Ingi var markahæstur í Valsliðinu með sjö mörk en hann fékk líka tækifæri til að skora sigurmarkið annan leikinn í röð. Finnur skoraði sigurmark Vals út í Eyjum en brást bogalistin í lokin á móti Mosfellingum. Seinna kom í ljós að hann gekk ekki heill til skógar.

Finnur Ingi fór á vítapunktinn í stöðunni 28-28, 29 sekúndum fyrir leikslok, en skaut í slánna. Afturelding náði ekki að nýta síðustu sóknina sína og liðin gerðu jafntefli.

„Finnur Ingi verður frá því hann ristarbrotnaði. Þetta var korters rammi á þriðjudaginn þar sem ég fékk þessar tvær fréttir. Þetta var vont korter á mínum þjálfaraferli, ég verð að viðurkenna það,“ sagði Snorri Steinn Guðjónsson, þjálfari Valsliðsins en hann fékk þá líka að vita að Ýmir Örn Gíslason væri á leiðinni til Rhein Neckar Löwen.

„Það mun taka tíma að melta þetta og ég er ekkert búinn að melta þetta. Við verðum að því í einhvern tíma. Það er bara áfall að missa þessa tvo drengi, fyrir mig og fyrir Finn að vera meiddur,“ sagði Snorri Steinn.

„Að því sögðu þá höfum við ekkert val því við þurfum að spila leikina. Síðasta sem við gerum er að fara að leggjast niður því það kemur ekki til greina,“ sagði Snorri Steinn.

Finnur Ingi Stefánsson hefur skorað 4,5 mörk í leik í Olís deildinni í vetur og er með 70 prósent skotnýtingu.

Hann missti líka lykilmenn á svipuðum tíma á síðasta tímabili þegar bæði Magnús Óli Magnússon og Agnar Smári Jónsson meiddust.

„Ég ætla ekki að segja að ég sé vanur þessu því þetta venst illa. Þetta er bara partur af þessu og við ætlum ekki að fara væla yfir þessu. Svona er bara bransinn. Þú getur misst menn í meiðsli og það er hægt að selja leikmenn. Það er bara þannig og þetta er bara eitthvað sem við þurfum að glíma við. Þetta er bara áskorun fyrir mig og okkur sem lið,“ sagði Snorri Steinn.

Það verður viðtal við Snorra í kvöldfréttum Stöðvar tvö og líka inn á Vísi seinna í kvöld.