Verkfall í augum barns

Ég sat á miðju Stjörnutorgi með fimm ára leikskólabarninu mínu í vikunni. Hún átti að vera í leikskólanum en í staðinn sat hún með brauðstangarsósu út á kinn og með sleikjó í vasanum.

Dóttir: Mamma, af hverju eru kennararnir mínir í verkfalli?

Mamman: Af því þau vilja fá hærri laun.

Dóttir: Mamma, hvað eru laun?

Mamma: Það eru peningar sem maður fær þegar maður vinnur í vinnunni sinni. Eins og konan í ísbúðinni fær líka laun fyrir að afgreiða okkur með ísinn.

Dóttir: Hvað gera kennararnir mínir þá? Eru þeir að vinna? (Ekkert skrýtið að hún spyrji, henni finnst bara kennararnir sínir vera ömmur og frændfólk sem elskar sig).

Mamman: Þeir sannarlega vinna. Þeir passa það dýrmætasta sem við foreldrarnir eigum. Ykkur. 

Dóttirin: Eru börn dýrmætara en bíll? Eða hús? Eða fjársjóðskista?

Mamman: Börn eru dýrmætari en allur fjársjóðurinn í heiminum!

Þögn.

Dóttirin: Þá finnst mér að þeir ættu að fá marga, marga, marga peninga. Eða ekki peninga, heldur demanta. 

I rest my case. 

Höfundur er lífsleiknikennari, heilsuráðgjafi og sérlegur áhugamaður um mannlegt eðli.