Hamrén vildi ekki neyða Gylfa, Alfreð og Jóhann Berg til að spila

Þrír lykilmenn í íslenska landsliðinu gáfu ekki kost á sér í landsleikina á móti Englandi og Belgíu og þrír aðrir missa af leikunum af öðrum ástæðum.

Erik Hamrén, þjálfari íslenska karlalandsliðsins í knattspyrnu, fór í dag yfir valið sitt á blaðamannafundi og þar kom líka fram af hverju það vantar svona marga lykilmenn í íslenska landsliðið að þessu sinn.

Hamrén fór sérstaklega yfir forföll hjá sex leikmönnum eða það eru Aron Einar Gunnarsson, Gylfi Þór Sigurðsson, Ragnar Sigurðsson, Jóhann Berg Guðmundsson, Alfreð Finnbogason og Rúnar Már Sigurjónsson.

Landsliðsfyrirliðinn Aron Einar Gunnarsson fær ekki leyfi til að koma frá Katar vegna nýju sóttvarnarreglnanna sem FIFA setti á dögunum. Al Arabi, félagið hans Aron, nýtti sér nýja reglu FIFA til að neita Aroni um að taka þátt í leikjunum. Hamrén segir hann hafa reynt allt til að fá að koma, og að Heimir Hallgrímsson hafi reynt að hjálpa til, en félagið hafi tekið þessa ákvörðun.

Rúnar Már Sigurjónsson er meiddur og því ekki með.

Ragnar Sigurðsson er meiddur og Hamrén vildi frekar að hann væri áfram í Danmörk til að ná sér góðum í stað þess að koma til móts við landsliðið.

Gylfi, Jóhann og Alfreð ákváðu að taka ekki þátt í leikjunum, vegna stöðu hjá sínum félögum. Hamrén segir þá vilja spila fyrir landsliðið en talið sig þurfa að taka þessa ákvörðun á þessum tímapunkti.

„Ég er að sjálfsögðu ekki ánægður með þetta en verð að sætta mig við það. Ég mun aldrei neyða menn til að spila fyrir landsliðið sitt,“ segir Hamrén á fundinum í dag.