Vaxandi lægð sem fer yfir landið og rigning víðast hvar

Um 400 kílómetrum vestur af Reykjanesi er vaxandi 997 millibara lægð sem fer yfir landið í dag. Landsmenn mega reikna með sunnan og suðaustan átt, víða 10-15 metrum á sekúndu, en heldur hvassari í vindstrengjum um norðvestanvert landið.

Rigning verður víðast hvar, með talsverðri rigningu sunnan- og vestantil eftir hádegi, en þurrt norðaustast á landinu fram á kvöld.

Þetta kemur fram í hugleiðingum veðurfræðings á vef Veðurstofunnar. Í nótt verði lægðin komin norður fyrir landið og rakasta loftið komið austur fyrir landið.

„Vindur snýr sér til vesturs og það dregur úr úrkomu. Lægðin verður orðinn dýpri og það hvessir í nótt, vestan 15-23 m/s á austurhelmingi landsins á morgun og það gæti verið lag að huga að lausum munum á þeim slóðum.

Hægari vindur vestantil á landinu. Víða dálítil rigning eða skúrir, en þurrt á Suðausturlandi og Austfjörðum og það fer að lægja annað kvöld.“

Veðurhorfur á landinu næstu daga

Á mánudag: Vestan og norðvestan 15-23 m/s, hvassast í vindstrenjum um austanvert landið, en heldur hægari vestantil á landinu. Rigning norðanlands og skúrir syðra, en þurrt að kalla fyrir austan. Hiti 4 til 14 stig, hlýjast á Suðausturlandi.

Á þriðjudag: Norðlæg átt 8-15 m/s, skýjað og úrkomulítið um norðanvert landið. Heldur hægari vindur sunnantil og bjart með köflum, en stöku skúrir um kvöldið. Hiti 3 til 7 stig, en 8 til 14 stig að deginum syðra.

Á miðvikudag: Fremur hæg breytileg átt og víða bjartviðri. Hiti 6 til 13 stig, hlýjast vestanlands. Hvessir, þykknar upp, og fer að rigna sunnan- og vestantil um kvöldið.

Á fimmtudag: Suðaustan og austan 10-18 m/s, hvassast vestantil. Víða rigning, en úrkomulítið norðaustanlands. Hiti 7 itl 12 stig.

Á föstudag: Ákveðin norðaustanátt og rigning um norðanvert landið, en skúrir syðra. Kólnar heldur.

Á laugardag:

Útlit fyrir norðanátt og rigningu norðanlands en bjartviðri sunnantil. Hiti 3 til 11 stig, hlýjast syðst.