Gæludýr.is: Fimmta verslunin opnuð og nú á Norðurlandi

Ingibjörg Salóme Sigurðardóttir framkvæmdastjóri Gæludýr.is skrifar:

Við eigum 10 ára afmæli í ár og erum að opna fimmtu verslunina okkar. Fyrir eru verslanir á Smáratorgi í Kópavogi, Bíldshöfða og Fiskislóð í Reykjavík ásamt verslun að Helluhrauni í Hafnarfirði. Síðustu ár höfum við haft augun opin fyrir hentugu húsnæði á Akureyri enda mikið af viðskiptum þaðan í gegnum vefverslunina okkar.

Það var svo fyrir fáeinum mánuðum sem við heyrðum af húsnæðinu á Baldursnesi 8 og eftir skoðun sáum við að þetta væri húsnæðið sem uppfyllti okkar kröfur um stærð og aðgengi. Að auki var svo pláss fyrir fyrirlestrarsal þar sem verður boðið upp á fyrirlestra og dýratengd námskeið. Snyrtistofa Gæludýr.is verður svo með ferðasnyrtistofu sem mun koma reglulega norður og bjóða snyrtingar á hundum og köttum. Húsnæðið er í heild hátt í 1000 fm2.

Viðbrögðin hafa verið framar okkar björtustu vonum og höfum við fundið mikinn meðbyr frá gæludýraeigendum á Norðurlandi og spennu fyrir opnuninni og hlökkum við afar mikið til komandi missera.

Opnunartilboð

Í tilefni af opnuninni á Baldursnesi ákváðum við að bjóða vegleg opnunartilboð fyrstu vikuna ásamt því að vera með kynningar og ráðgjöf um þjálfun, umhirðu og næringu og verður því nóg um að vera fyrstu dagana og reglulega svo í framtíðinni.

Mikið af nýjum vörum

Dýraeigendur gera sífellt meiri kröfur um gæðavörur fyrir dýrin sín og við höfum lagt okkur mikið fram um að geta boðið gæludýraeigendum upp á framúrskarandi vörur í öllum gæðaflokkum.

Síðustu mánuði höfum við verið að fá inn nokkurt magn af nýjum vörum og vörulínum. Má þar nefna Happy Dog og Happy Cat fóðurlínurnar frá Þýskalandi. Fóðrið hefur verið hagstætt í innkaupum svo við getum látið okkar viðskiptavini njóta þess að kaupa gæðafóður á frábæru verði. Í ágúst fengum við svo heimsþekktar feldvörur fyrir hunda og ketti frá Chris Christensen en þar má finna allt frá sjampóum til notkunar dags daglega, yfir í sérhæfðari feldvörur fyrir sýningarhunda og -ketti. Ný fiskabúr í öllum stærðum frá Ciano hafa svo fengið afar góðar viðtökur.

Saga Gæludýr.is

Gæludýr.is var í upphafi stofnað sem vefverslun en fljótlega kom í ljós mikil þörf fyrir hefðbundna verslun. Fyrsta yfirlýsta lágvöruverðsverslunin með gæludýravörur var svo opnuð í Skútuvogi 13. Í lok október 2010 var versluninni í Skútuvogi lokað og 500 fm2 stórmarkaður með gæludýravörur opnaður á Korputorgi. Ári síðar opnaði verslunin á Smáratorgi sem er stærsta verslun Gæludýr.is í dag. 2017 var opnað í Hafnarfirði, 2018 á Granda og svo núna í september á Akureyri. Yfirlýst markmið er að bjóða hagstætt verð en við höfum verið ótrúlega heppin með hversu mikinn áhuga starfsfólkið okkar hefur á gæludýrum og hversu mikið það leggur sig fram við að læra meira um dýrin og að þjónusta eigendur þeirra.