Telja hluthafa í Icelandair geta fengið 17 til 50 prósenta ávöxtun

Það kemur í ljós eftir um sólarhring hvort stjórn Icelandair tekst að endurreisa rekstur félagsins með hlutafjárútboði sem hófst klukkan níu í morgun. Stærsti óvissuþátturinn er hvort stærstu lífeyrissjóðir landsins taki þátt í útboðinu.

Í hlutafjárútboði Icelandair sem hófst klukkan níu í morgun og lýkur klukkan fjögur síðdegis á morgun stefnir stjórn félagsins á að safna á bilinu 20 til 23 milljörðum króna í nýju hlutafé. Hlutir eru einungis seldir rafrænt hjá Íslandsbanka, Landsbanka og í gegnum vefsíðu félagsins og er lágmarksfjárfesting í bók A 20 milljónir króna en að lágmarki 100 þúsund og hámarki 20 milljónir í bók B.

Þeir sem kaupa hluti sem eru á genginu ein króna öðlast einnig rétt til að kaupa 25 prósent af hlut sínum til viðbótar á næstu tveimur árum á stighækkandi gengi upp að 1,30 krónur. Þeim ber þó ekki skylda til þess.

Icelandair hélt almennan kynningarfund á útboðinu, stöðu félagsins og væntingum á hótel Natura í morgun. Þar kom fram að samningar við lánadrottna, Boeing og fleiri aðila væru háðir því að markmið hlutafjárútboðsins gengju eftir. En félagið hefur þegar samið við Íslandsbanka og Landsbanka um kaup á samtals sex milljarða hlut, þannig að í raun þarf félagið að safna 14 milljörðum frá fjárfestum.

Bogi bjartsýnn á framtíð Icelandair

Bogi Nils Bogason forstjóri Icelandair Group sagði viðskiptalíkan Icelandair og leiðarkerfi hafa sannað sig og mikil tækifæri væru í íslenskum ferðamannamarkaði og flugi yfir Atlantshafið.

„Breytingar sem við erum að sjá hjá flugfélögum í kringum okkur munu fela í sér tækifæri fyrir okkar leiðarkerfi sem við ætlum að nýta okkur. Þannig að við teljum að fjárfesting í Icelandair Group geti falið í sér ágæta ávöxtun á næstu árum. En að sjálfsögðu er alltaf áhætta í hlutabréfakaupum. Ekki síst í flugfélögum á þessum óvissutímum,“ sagði Bogi.

Í máli Svönu Huldar Linnet forstöðumanns fyrirtækjaráðgjafar Landsbankans kom reyndar fram að að ávöxtunin á næstu árum gæti orðið mjög góð miðað við forsendur félagsins.

„Miðað við þessar forsendur sem eru gefnar upp hér í næmitöflunni má gera ráð fyrir að væntinga ársávöxtun verði á bilinu sautján til fimmtíu prósent út árið 2024,“ sagði Svana Huld en ítrekaði fyrirvara Boga um að fjárfesting í hlutabréfum væri í eðli sínu áhættusöm.

Áhugi lífeyrissjóða skiptir sköpum

Í svari við fyrirspurn á kynningarfundinum um arðsemi hluthafa á undanförnum árum sagði Bogi að eftir hlutafjárútboð félagsins árið 2010 upp á 70 milljónir dollara hafi félagið greitt út meiri arð fram að kórónufaraldrinum en safnaðist í því hlutafjárútboði.

Eva Sóley Guðbjörnsdóttir framkvæmdastjóri fjármálasviðs Icelandair sagði samninga við ýmsa aðila hafa skilað félaginu 450 milljónum dollara í bættri lausafjárstöðu. Hvernig til tekst hins vegar í hlutafjárútboðinu ræðst af þátttöku lífeyrissjóðanna sem upplýsa ekki um hvað þeir hyggjast gera og því liggur það ekki ljóst fyrir fyrr en að útboðinu loknu á morgun.

Í dag eru sex íslenskir lífeyrissjóðir meðal sjö stærstu hluthafa í Icelandair. Lífeyrissjóður verslunarmanna trónir á toppnum með 11,81 prósenta hlut, næst stærsti hluthafinn er Par Investment Partners í Boston með 10,49 prósent og þar fyrir neðan raðast Gildi, Birta, Lífeyrissjóður ríkisstarfsmanna A-deild og Stefnir með frá 7,4 prósenta hlut niður í 5,17 prósent. Aðrir lífeyrissjóðir og fjárfestar eru þar fyrir neðan.