Falsaði sögu sína með Íslamska ríkinu

Lögreglan í Kanada hefur handtekið umdeildan mann sem sagðist hafa verið böðull fyrir Íslamska ríkið. Maðurinn heitir Shehroze Chaudhry og er 25 ára gamall. Hann hefur einnig gengið undir nafninu Abu Huzayfah, og er sakaður um að hafa falsað sögu sína. Meðal annars sagði hann þessa sögu sína í hlaðvarpsþætti New York Times sem hlaut ýmiss verðlaun. Hann sagðist hafa tekið minnst tvo menn af lífi og lýsti þeim aftökum með mikilli nákvæmni.

Chaudhry fór hann til Pakistan eftir skóla og þá til frekara náms. Hann hefur þó sagt það yfirskin og í rauninni hafi hann farið til Sýrlands og gengið til liðs við ISIS. Hann sneri aftur til Kanada árið 2016.

Meðal annars sagðist hann hafa myrt fíkniefnasala með því að stinga hann ítrekað og krossfesta hann svo.

Sögur hans hafa þó einkennst af miklu ósamræmi. Til dæmis um það hve lengi hann var í Sýrlandi á tímum kalífadæmis ISIS árið 2014. Hann hefur sömuleiðis sagt öðrum fjölmiðlum að hann hefði engan drepið í Sýrlandi.

Chaudhry hafði ekki verið handtekinn áður en stór hluti umrædds hlaðvarps fjallaði þó um það hve erfiðlega hefði gengið að sannreyna sögur hans en það er vandi sem stendur frammi fyrir mörgum ríkjum í Evrópu og Norður-Ameríku.

Fjöldi manna frá þessu heimsálfum gengu á sínum tíma til liðs við ISIS og margir þeirra eru nú í haldi sýrlenskra Kúrda. Það þykir hættulegt að taka við þessum mönnum í heimalöndum þeirra vegna þess hve erfitt er að sanna fyrir dómi að mennirnir hafi í raun gengið til liðs við hryðjuverkasamtökin og framið glæpi og önnur ódæmi. Engin skjöl, myndir eða annað sé til.

Sjá einnig: Mennirnir sem enginn vill fá heim

Börn þessara manna og kvenna eru sömuleiðis mörg hver í fangabúðum í Sýrlandi.

Eftir að saga Chaudhry birtist í fjölmiðlum urðu miklar deilur á þingi Kanada, samkvæmt frétt Global News. Íhaldssamir kanadískir þingmenn kölluðu eftir upplýsingum um af hverju hann hefði ekki verið handtekinn og af hverju frjálslynd ríkisstjórn landsins leyfði þessu „fyrirlitlega dýri að ganga um landið“.

Í tilkynningu frá lögreglunni segir að eftir langa rannsókn hafi Chaudhry verið ákærður fyrir gabb varðandi hryðjuverkastarfsemi. Ákæran byggi á mörgum viðtölum við fjölmiða og að þau viðtöl hafi valdið ótta í Kanada.

Hámarksrefsing fyrir slík brot er fimm ára fangelsisvist.