Kórónuðu ömurlega umgengni með falleinkunn

Guðrún Valdís Þórisdóttir, sem leigir út íbúðir til ferðamanna á Selfossi, segist aldrei hafa lent í öðru eins og þegar hún opnaði dyrnar að einni íbúðinni í gær. Par á að giska á þrítugsaldri hafði skilið eftir allt í rúst og eftir athugasemdir um umgengnina gaf parið Guðrúnu einn í einkunn fyrir gistinguna.

Guðrún Valdís birti myndir, öðrum til varnaðar, í Baklandi ferðaþjónustunnar í dag. Þar segir hún um að ræða par með breskt ríkisfang sem hafi tjáð sig á kínversku. Hún vonar að fleiri þurfi ekki að lenda í því að þurfa að kalla út auka mannskap vegna svo slæmrar umgengni.

Aldrei lent í neinu í líkingu við þetta

„Íbúðin var í rúst. Ég meira að segja tók ekki myndir strax. Þessar myndir eru eftir að ég tók aðeins á því,“ segir Guðrún Valdís.

Ferðamennirnir yfirgáfu íbúðina í gær og þá blöstu ósköpin við. Guðrún Valdís var loks að sjá fyrir endann á þrifunum þegar blaðamaður sló á þráðinn um ellefuleytið í dag.

„Ég hef rekið hótelþjónustu í sjö ár og aldrei lent í öðru eins. Oft lent í einhverju slæmu en ekkert í líkingu við þetta.“

Myndirnar tala sínu máli en Guðrún Valdís segist ekki hafa fattað að taka myndir fyrr en hún var komin af stað í tiltekt. Hrúga af snýtibréfum á gólfi, mikil olíunotkun við eldamennsku og skemmd í borðplötu er meðal þess sem blasti við.

Ferðamennirnir gistu í fjórar nætur í einni af sex íbúðum Hótel Þóristún apartments. Ekki var aðeins umgengnin slæm heldur skildu þau eftir sig ýmislegt, svo sem ferðatösku, skó, sólgleraugu og fleira. Guðrún sló á þráðinn til þeirra því hún taldi þau hafa gleymt þessum hlutum.

Fékk einn í einkunn

„Ég byrjaði símtalið blíðlega og spurði hvort þau vildu ekki koma að sækja hlutina,“ segir Guðrún. Þá var svarið að þau hefðu verið á hraðferð og ákveðið að skilja hlutina eftir.

Í framhaldinu tilkynnti Guðrún þeim að hún hefði aldrei séð svo slæma umgengni á sjö árum í hótelrekstri og þau væru ekki velkomin aftur.

Gestir á Hótel Þóristún koma flestir í gegnum Booking.com þar sem margir gefa einkunn fyrir dvöl sína. Guðrún státar af 9,4 í einkunn og segist í góðum samskiptum við langsamlega flesta gesti sína.

„Svo fékk ég einkunn frá þeim í morgun. Þau gáfu mér einkunnina einn,“ segir Guðrún. Þau tíðindi fékk hún á kafi í tiltekt í morgun. Bónus ofan á allt saman, segir Guðrún kímin. Augljóslega refsing fyrir tiltalið en fram til þessa höfðu þau talað fallega um íbúðina og hve frábært allt væri.

„Þetta var svekkjandi eftir margra tíma þrif á íbúðinni. Ég þurfti að kalla út aukafólk til að taka íbúðina í gegn.“

Fólk gangi almennt vel um

Guðrún segir flesta gesti sína á leiðinni í austurátt og því er líklegur áfangastaður parsins Vík, Kirkjubæjarklaustur eða í þeirri grennd. Fáir ferðamenn séu á ferli núna en þeir sem þó eru dvelja hér í lengri tíma vegna kröfu um sóttkví við komu.

Þannig sé hluti af gestum hennar fólk sem dvelji í sóttkví, lögum samkvæmt, áður en það heldur áfram för sinni um landið.

Varðandi reksturinn á þessum skrýtnu tímum segir hún hann ganga furðu vel.

„Ég er heppin. Ég er með sex íbúðir og það hefur verið nóg að gera. Fólk hefur getað komið í sóttkví þarna.

Ég get sennilega ekkert kvartað miðað við ástandið allt í kring,“ segir Guðrún.

Fólk gangi almennt rosalega vel um og hún sé því alls ekki von þessu.

„Íbúðirnar eru rosalega fínar og mín reynsla er að fólk gangi vel um fyrir vikið,“ segir hún. Von er á næstu gestum og hún getur því farið að gleyma þessu máli.

„Þetta er bara leiðinlegt. Sérstaklega ef maður er að reyna að gera sitt besta.“