Einkunnir Íslands: Gulli Victor stóð upp úr á döpru kvöldi

Karlalandslið Íslands reið ekki feitum hesti frekar en fyrri daginn frá viðureign sinni við Dani í A-riðli Þjóðadeildarinnar í kvöld. Strákarnir okkar töpuðu 3-0 en um sjöunda tap Íslands í röð er að ræða í Þjóðadeildinni. 

Um var að ræða 24. tilraun karlalandsliðs Íslands til að leggja Dani að velli. Hefndin fyrir 14-2 tapið á Parken þarf að bíða betri tíma. Mögulega á Parken 15. nóvember í seinni leik liðanna í riðlinum.

Fátt gott er um leik okkar manna að segja í kvöld. Ísland hefur skorað 2 mörk og fengið á sig 22 í sjö töpum í Þjóðadeildinni. Ekki er að reikna með að hagurinn vænkist á miðvikudaginn þegar stórlið Belga mætir í heimsókn.

Að neðan má sjá einkunnir leikmanna íslenska liðsins.

Hannes Þór Halldórsson, markvörður 4

Þurfti nánast ekkert að gera allan fyrri hálfeikinn þrátt fyrir mikla yfirburði Dana. Brást ekki nógu vel við í fyrsta markinu sem hefði þó ekki átt að standa. Gat lítið gert í öðru og þriðja marki Dana.

Guðlaugur Victor Pálsson, hægri bakvörður 6

Ágæt frammistaða hjá Guðlaugi Victori sem heldur áfram að stimpla sig inn í hægri bakvarðarstöðuna. Með mikið sjálfstraust og af honum stendur mikil ógn þegar hann fær pláss til að nýta hlaupagetu sína.

Sverrir Ingi Ingason, miðvörður 4

Kom inn í liðið fyrir Kára Árnason sem var ekki til taks vegna meiðsla. Ekki með sömu sendingagetu og Kári sem sást í uppspilinu. Valdi oft erfiðar sendingar upp völlinn undir lítilli pressu.

Ragnar Sigurðsson, miðvörður 4

Miðvörðurinn saknaði mögulega Kára í vörninni og átti í nokkru basli í varnarleiknum í föstum leikatriðum þar sem Danir komust endurtekið með hausinn í boltann. Sem lauk með marki á lokamínútu fyrri hálfleiks.

Hörður Björgvin Magnússon, vinstri bakvörður 4

Danir komust endurtekið í góðar fyrirgjafastöður í fyrri hálfleiknum, sérstaklega utan af hægri kanti. Hörður var þó oftar en ekki kominn inn á teiginn að passa sinn mann.

Arnór Ingvi Traustason, hægri kantmaður 4

Skapaði af harðfylgi fyrsta færi Íslands í leiknum, og eitt af fáum í leiknum, en átti annars erfitt uppdráttar í sókninni. Ekki sterkasti varnarmaður landsliðsins og naut sín ekki í sóknarleik sem var lítill lengst af meðan hann var inni á vellinum.

Aron Einar Gunnarsson, miðjumaður 5

Var í eltingaleik allan fyrri hálfleikinn líkt og restin af íslenska liðinu. Dekkaði ekki Kjær í fyrsta markinu. Fór útaf í hálfleik af óþekktum ástæðum þegar þetta er skrifað. Ekki batnaði ástandið með fjarveru hans í síðari hálfleik sem er þó til marks um mikilvægi hans í skipulagi liðsins.

Rúnar Már Sigurjónsson, miðjumaður 4

Versta mögulega byrjun síðari hálfleiks kom í kjölfar marktilraunar Rúnars Más sem aftasti maður. Boltinn hrökk til Christian Eriksen sem Rúnar Már náði ekki að elta uppi. Þar með var leikurinn tapaður. Sýndi ágæt tilþrif inn á milli.

Birkir Bjarnason, vinstri kantmaður 5

Gott að hafa Birki sem getur leyst bæði kantinn sinn vinstra megin og dottið inn á miðjuna. Yfirvegaður með boltann en náði að skapa lítið.

Gylfi Þór Sigurðsson, framherji 4

Leiðtoginn sem var á móti Rúmeníu, sá sem gerði gæfumuninn, náði aldrei að sýna sitt rétta andlit. Var á köflum ósýnilegur. Ef markmið Dana var að klippa Gylfa Þór út úr leiknum þá gekk það fullkomlega. Við erum vön mun meiru frá Gylfa.

Alfreð Finnbogason, framherji -

Meiddist á tíundu mínútu leiksins eftir að hafa fengið fyrsta færi Íslands. Schmeichel sá við honum. Spilaði ekki nógu lengi til að fá einkunn.

Varamenn:

Jón Daði Böðvarsson kom inn á fyrir Alfreð Finnbogason á 12. mínútu 3

Komst lítið í takt við leikinn eftir að hafa komið inn á snemma leiks fyrir Alfreð.

Mikael Anderson kom inn Aron Einar Gunnarsson á 46. mínútu 4

Var þokkalega mikið í boltanum og hefði getað gefið Íslandi veika von þegar hann fékk langbesta færi Íslands í leiknum á 63. mínútu.

Albert Guðmundsson kom inn á fyrir Arnór Ingva Traustason á 68. mínútu 4

Náði að töfra lítið fram frekar en aðrir leikmenn Íslands í kvöld.

Hólmar Örn Eyjólfsson kom inn á fyrir Ragnar Sigurðsson á 73. mínútu -

Spilaði of lítið til að fá einkunn.