Rekinn á fundi fyrir framan allan leik­manna­hópinn

Kjartan Henry Finnbogason var rekinn frá Vejle eftir að þjálfari liðsins mistúlkaði viðtal sem hann fór í eftir tapleik gegn AGF í 1. umferð dönsku úrvalsdeildarinnar þetta tímabilið.

Kjartan Henry ræddi við Kian Fonoudi, íþróttafréttamann á Diaplay, um síðustu helgi er Vejle og Horsens mættust. Kjartan Henry yfirgaf Vejle undir lok félagaskiptagluggans og gekk í raðir Horsens, þar sem hann hafði leikið áður, en skiptin frá Vejle gengu ekki eins og í sögu.

Vísir birti hluta af viðtalinu fyrir helgi þar sem Kjartan sagði frá því að hann hefði ekki mátt borða með liðsfélögum sínum og hafi verið látinn æfa með U19-ára liði félagsins.

Kjartan fór ítarlega yfir aðdragandann að tímabilinu og fyrir fyrsta leik voru teikn á lofti að KR-ingurinn væri ekki fremstur í goggunarröðinni hjá vEjle.

„Átta eða níu dögum fyrir fyrsta leikinn fæ ég skilaboð frá eigandanum þar sem hann segir mér að vinur hans búi í Tyrklandi. Hann vinni sem umboðsmaður. Það er lið í Tyrklandi sem vantar framherja og hvort að ég gæti ekki farið þangað og spilað?“ sagði Kjartan.

„Það er kannski byrjunin á því þar sem ég fæ undarlegu tilfinningu í magann. Þetta kom mér á óvart. Ég spurði hann af hverju að hann vildi losa sig við markaskorarann sinn rétt áður en að deildin hófst. Svo segir hann bara hreinskilið að hann sem eigandi vill hafa unga leikmenn því það er meiri líkur á að selja þá.“

„Ég bar virðingu fyrir því en ég mér finnst það líka í lagi að leikmaður sem á eitt ár eftir af samningi sínum á rétt á því að segja takk, en nei takk. Ég gerði það. Því var hvorki tekið á góðan hátt né slæman. Ég fékk ekkert svar eftir að ég sagði takk.“

Kjartan Henry var á bekknum í fyrsta leiknum gegn AGF og eftir leikinn fór hann í viðtal sem átti eftir að draga dilk á eftir sér. Og einhverjir mistúlkuðu viðtalið að mati Kjartans, þar á meðal þjálfari liðsins, Constantin Gâlcă, sem hvorki talar né skilur dönsku.

„Ég lét þjálfarann vita að ég hafi farið í viðtal eftir þennan leik og að ég hafi nefnt eigandann. Það má maður víst ekki í Vejle. Þetta er erfitt fyrir þjálfarann því hann les ekki fjölmiðlana og skilur ekki dönsku en mér fannst hann eiga skilið að vita þetta, því þetta gæti orðið vesen. Eftir að við töluðum saman þá var þetta fínt og ég æfði með liðinu.“

Kjartan var svo ekki í hópnum í næstu tveimur leikjum; gegn SönderjyskE og FCK á heimavelli. Daginn eftir leikinn gegn FCK dró svo til tíðinda.

„Daginn eftir FCK leikinn má ég ekki æfa með liðinu. Ég var rekinn af þjálfaranum því hann hélt að ég hefði sagt eitthvað sem ég sagði ekki. Það var fundur hjá liðinu og við héldum allir að við værum að fara yfir leikinn gegn FCK. Svo allt í einu segir þjálfarinn fyrir framan alla að ég má ekki æfa með liðinu meira. Lengra er þetta ekki,“ en hver voru hans viðbrögð?

„Ég var í áfalli. Liðsfélagarnir kíktu á mig og voru bara: Ha? Ég heyrði þetta í fyrsta skipti þarna svo ég vissi ekki hvað ég átti að gera.“

Viðtalið í heild sinni má sjá hér en Kjartan spilaði í 75 mínútur er Horsens tapaði 2-0 fyrir FCK í gær.