„Sjálfstæði Taívans þýðir stríð“

Þetta kom fram á mánaðarlegum blaðamannafundi í Kína í morgun. Þar var talsmaðurinn Wu Qian spurður út í það að Kínverjar hefðu flogið fjölda sprengjuflugvéla og orrustuþota nærri Taívan undanfarið.

Sjá einnig: Halda heræfingar og vara við köldu stríði

Wu sagði það hafa verið nauðsynlegt vegna „öryggisástandsins“ á Taívansundi og til að tryggja fullveldi og öryggi Kína, samkvæmt frétt Reuters.

Hann sagði aðgerðirnar vera viðbrögð við afskiptum og ögrunum sjálfstæðissinna í Taívan og að þar væri einungis um minnihluta íbúa að ræða.

„Við vörum þá sjálfstæðissinna við því að þeir sem leika sér að eldi munu brenna sig og að sjálfstæði Taívan þýðir stríð,“ sagði talsmaðurinn.

Ráðamenn í Kína telja að ríkisstjórn sjálfstæðissinna í Taívan stefni á því að lýsa formlega yfir sjálfstæði. Tsai Ing-wen, forseti, hefur þó ítrekað sagt að eyríkið sé þegar sjálfstætt ríki sem heiti Lýðveldið Kína, sem er formlegt nafn Taívan.

Formlegt nafn Kína er í raun Alþýðulýðveldið Kína.

Í stuttu máli sagt þá hafa Kínverjar lengi gert tilkall til Taívan sem hefur í raun verið sjálfstætt ríki frá árinu 1949. Þá flúðu meðlimir þjóðernissinna til eyjunnar undan kommúnistum í borgarastyrjöld landsins. Taívan hefur þó aldrei formlega lýst yfir sjálfstæði.

Á undanförnum árum hefur sjálfstæðissinnum vaxið ásmegin í Taívan.

Kínverjar hafa svarað því með auknum pólitískum og hernaðarlegum þrýstingi gegn eyríkinu. Ferðum orrustuþota og herskipa inn á varnarsvæði Taívans hefur fjölgað verulega.

Reuters hefur einnig eftir sérstöku ráði í Taívan sem er yfir málefnum meginlandsins að yfirvöld Kína ættu ekki að vanmeta vilja Taívana til að verja fullveldi þeirra, frelsi og lýðræði.

Ástand herafla Taívans hefur þó versnað töluvert á undanförnum árum, samhliða auknu álagi á hermenn.

Háttsettir forsvarsmenn í herafla Taívan sögðu í fyrra að markverð breyting hefði átt sér stað í afstöðu ráðamanna í Kína. Embættismenn og herforingjar hafi hætt að ræða fræðilega um það að hernema Taívan með valdi og farið að tala sín á milli um áætlanir fyrir mögulegar hernaðaraðgerðir.

Bandaríkin standa við bakið á Taívönum

Ráðamenn í Bandaríkjunum ítrekuðu um síðustu helgi að Bandaríkin stæðu við bakið á Taívan í deilum þeirra við Kína og lýstu yfir áhyggjum af þeim aukna þrýstingi sem verið sé að beita gegn eyríkinu.

Sjá einnig: Orrustuþotum og sprengjuvélum flogið yfir Taívansundi

Bandaríkin slitu formlegum tengslum við Taívan árið 1979, að kröfu Kínverja, en hafa þrátt fyrir það haldið umfangsmiklum óformlegum tengslum við ríkið og útvega Taívan meðal annars vopn.