Landsvirkjun og Rio Tinto ná samkomulagi

Samkomulagið er einnig sagt tryggja fyrirsjáanlegt tekjustreymi Landsvirkjunar og auka sveigjanleika fyrir báða aðila. Það kveður á um sölu á 309 MW eða 3.415 GWst á ári, eins og áður, og gildir til ársins 2036, samkvæmt tilkynningu.

Í tilkynningunni segir að grunnur raforkuverðsins hafi tekið breytingum. Hann sé áfram bundinn Bandaríkjadal og tengdur bandarískri vísitölu neysluverðs (CPI), auk þess að vera að litlum hluta tengdur álverði. Það feli í sér aðlögun verðs að alþjóðlegum mörkuðum að einhverju leyti.

Forsvarsmenn Rio Tinto hafa ákveðið að draga til baka kvörtun sína til Samkeppniseftirlitsins frá því í júlí 2020 varðandi orkusölu til álversins í Straumsvík.

Samningurinn verðu ekki opinberaður, samkvæmt áðurnefndri tilkynningu.

Viðræður Landsvirkjunar og Rio Tinto á Íslandi hófust í fyrra, eftir að forsvarsmenn álversins í Straumsvík kvörtuðu yfir háu raforkuverði og sögðu það koma niður á samkeppnishæfni álversins. Þá var tilkynnt að til greina kæmi að loka álverinu.

„Við fögnum því að náðst hafi samkomulag um breytingar á orkusölusamningnum, eftir beiðni Rio Tinto þar um. Niðurstaðan er báðum aðilum í hag og um leið eykur hún skilvirkni raforkukerfisins á Íslandi. Markmið Landsvirkjunar er, líkt og áður, að tryggja fyrirsjáanlegar tekjur um leið og við tökum tillit til breytinga á alþjóðlegum mörkuðum og á þörfum viðskiptavina okkar,“ er haft eftir Herði Arnarssyni, forstjóra Landsvirkjunar, í tilkynningunni.

„Við hjá Landsvirkjun höfum lagt áherslu á að styðja viðskiptavini okkar á þessum krefjandi tímum. Við erum staðráðin í að halda áfram að bjóða samkeppnishæft orkuverð um leið og við sinnum því hlutverki okkar að hámarka verðmæti þeirra endurnýjanlegu orkuauðlinda, sem okkur hefur verið treyst fyrir, til hagsbóta fyrir þjóðina alla.”

Rannveig Rist, forstjóri Rio Tinto á Íslandi, segir undirskriftina vera ánægjuleg tíðindi sem eyði óvissu um starfsemina í Straumsvík og bæti samkeppnishæfni hennar.

„Við í Straumsvík getum öll verið ákaflega stolt af þeim árangri sem starfsfólk ISAL hefur náð undanfarin ár. Þrátt fyrir margra ára óvissu hefur öll starfsemin einkennst af fagmennsku og æðruleysi og missti starfsfólk ekki sjónar af því sem mestu máli skiptir. Öryggis- og umhverfismálin hafa verið í mjög góðum farvegi, framleiðslan gengið vel og gæði hennar mjög stöðug og mikil. Þótt þessum áfanga sé náð erum við ekki komin fyrir vind. Áfram eru krefjandi aðstæður í áliðnaði og verður ISAL áfram undir pressu að ná árangri. Með þessu samkomulagi um raforkumál getum við hins vegar einbeitt okkur að framleiða hágæða ál með þarfir viðskiptavina okkar í huga.“