Sjáðu hvernig Mbappé fór með Barcelona vörnina í Meistaradeildinni í gær

Barcelona liðið spilar væntanlega ekki fleiri heimaleiki í Meistaradeildinni á þessu tímabili eftir að hafa fengið útreið á heimavelli á móti Kylian Mbappé og félögum í Paris Saint Germain í gærkvöldi.

PSG vann leikinn 4-1 og á seinni leikinn eftir á heimavelli sínum. Það var heldur fátt í leiknum í gær sem bendir til þess að Barcelona geti gert eitthvað í París.

Maður leiksins var án efa franski landsliðsframherjinn Kylian Mbappé sem blómstraði í fjarveru Neymar sem gat ekki spilað vegna meiðsla.

Mbappé skoraði þrennu í leiknum og ofar en ekki var vandræðalegt að fylgjast með varnarmönnum Barcelona reyna að halda aftur af honum.

Mbappé varð líka fyrstur til að skora þrennu á móti Barclona á Nývangi í útsláttarkeppni Meistaradeildarinnar og sá fyrsti í meira en tvo áratugi til að skora Evrópuþrennu á móti Barca á heimavelli spænsku risanna.

Mörk Kylian Mbappé voru líka af fallegri gerðinni og sýndu það svart á hvítu hversu öflugur knattspyrnumaður þessi 22 ára Frakki er orðinn.

Hér fyrir ofan má sjá mörkin hjá Kylian Mbappé í leiknum í gær og hér fyrir neðan eru fleiri tilþrif hjá Frakkanum í þessum leik.