Draga til baka rannsókn á skammtatölvum vegna „mistaka“

Grein sérfræðinganna vakti töluverða athygli á sínum tíma. Þeir héldu því fram að þeir hefðu fundið vísbendingar um öreind sem gæti gert mönnum kleift að þróa háþróaðar tölvur, að því er segir í frétt breska ríkisútvarpsins BBC.

Rannsóknin hefur nú verið dregin til baka í vísindaritinu Nature. Vísindamennirnir segja að þeir hafi meðal annars leiðrétt sum gögn að óþörfu og án þess að greina nógu skilmerkilega frá því. Þá hafi graf í grein um rannsóknina verið rangt merkt og þannig gefið misvísandi mynd af niðurstöðunum.

Óháð rannsókn á upphaflegu greininni benti þó ekki til að fræðimennirnir hefðu viljandi gefið ranga mynd af niðurstöðum sínum.

Microsoft segir að þetta skeki þó ekki trú fyrirtækisins á þróun skammtatölva, nýrri gerð tölva með margfalda afkastagetu á við núverandi kynslóð tölva. Fyrirtækið á í harðri samkeppni við önnur stórfyrirtæki eins og Google og IBM í kapphlaupinu um að verða fyrst til að búa til nothæfa skammtatölvu.

Skammtatölvur byggja á framandlegum eiginlegum skammtafræðinnar, undirgrein eðlisfræði sem fjallar um hegðun öreinda. Það er eiginleiki einda til þess að vera í fleiri en einu ástandi á hverjum tíma sem menn dreymir um að beisla.

Minnisein­ing­ar hefðbund­inna tölva nefn­ast bit­ar. Þeir geta tekið gildið núll eða einn. Í skammta­tölv­um hafa bitarn­ir, sem nefn­ast þá skammta­bit­ar, bæði gild­in sam­tím­is. Með aðeins fimm­tíu skammta­bit­um væri hægt að geyma 1.000 millj­ón millj­ón töl­ur sem tölv­an gæti unnið með all­ar á sama tíma. Slík fram­för í reiknigetu tölva þýddi að flókn­ir út­reikn­ing­ar, sem tölv­ur nú­tím­ans þurfa allt frá klukku­stund­um og upp í vik­ur og mánuði að mjatla á, væri hægt að leysa á ör­skots­stundu með skammta­tölv­um.