Blásið til sóknar í aðgengismálum hreyfihamlaðra

Já, það var bókstaflega blásið til fréttamannafundar um sóknina í dag því fundurinn hófst með því að Samúel Jón Samúelsson básúnuleikari og Snorri Sigurðsson trompetleikari gengu leikandi á hljóðfæri sín í salinn í Iðnó. Guðni Th. Jóhannesson forseti Íslands ávarpaði samkomuna fyrstur en hann er verndari átaksins.

„Ég fagna svo mjög þessu framtaki. Ég veit að borgin mun breyta um svip og ég veit að það er ykkur að þakka sem hér eruð. Haraldur á frumkvæðið en það gerir enginn einn það sem þarf að gera. Við tökum á þessu saman,“ sagði forsetinn meðal annars og vísaði til Haraldar Þorleifssonar forsprakka átaksins Römpum upp Reykjavík.

Katrín Jakobsdóttir forsætisráðherra fagnaði einnig átakinu og sagði pott víða brotinn hjá hinu opinbera í þessum efnum. Stjórnarráðið hefði nú þegar sett þrjár milljónir til átaksins og félags- og barnamálaráðherra tvær milljónir. Þá þyrfti að gera gangskör í þessum efnum í mörgum byggingum ríkisins.

„Þannig að ég þakka þér fyrir það Haraldur að drífa okkur hér í gang með þetta átak. Því það skiptir svo sannarlega máli og við getum öll verið sammála um að þetta er mannréttindamál sem við eigum einfaldlega að laga. Ég hlakka til að fá að taka þátt í þessu átaki og óska okkur öllum til hamingju með þennan góða dag í aðgengismálum,“ sagði forsætisráðherra.

Dagur B. Eggertsson borgarstjóri sagði hreyfihamlaða eðilega vilja fara um allt samfélagið. Það væri fyrir tilstilli Haraldar að draumur um aðgengissjóð Reykjavíkur væri nú orðinn að raunveruleika.

„En mig grunaði ekki, kæru vinir, að Haraldur væri slíkur kraftaverkamaður að geta náð öllum með og sjóðurinn sem stofnaður var í tíu milljónum í janúar er kominn í fimmtíu milljónir bara núna tveimur mánuðum seinna. Fyrir þinn og ykkar tilverknað og ég held að við eigum að gefa því sérstaklega gott klapp,“ sagði borgarstjóri og beindi máli sínu til Haraldar.

Haraldur segir átakið kalla á byggingu tveggja rampa í viku að jafnaði næsta árið. Aðgengissjóður veiti allt að 80 prósenta styrk til byggingar rampa og aðstoði ef meira vanti upp á.

„Þetta er bara byrjunin. Það er endalaust hægt að gera. En ef við náum hundrað römpum og fókusum á staði þar sem fólk er mikið að koma saman; í veitingahúsum, kaffihúsum, verslunum, þá mun þetta hafa mjög mikil áhrif fyrir fólk sem er í hjólastólum,“ sagði Haraldur Þorleifsson í viðtali við fréttastofu.