Dug­legasti leik­maður E­ver­ton, enginn betri í að klára færi og enn notaður sem fyrir­mynd hjá Rea­ding

Mikilvægi Gylfa Þórs sannaðist á dögunum er Ancelotti ætlaði að hvíla hann í leik gegn West Bromwich Albion. Það endaði með því að Gylfi kom inn af bekknum og lagði upp sigurmarkið innan við mínútu eftir að hann kom inn á.

„Þessi augnablik eru Sigurðsson í hnotskurn. Í þeim er hann upp á sitt besta og hefur verið frá upphafi tímabilsins. Hinn 31 árs gamli leikmaður virðist vera ganga í gegnum endurnýjun lífdaga. Hann er að spila í sinni uppáhaldsstöðu og hefur nú skorað sex mörk ásamt því að leggja upp níu í öllum keppnum,“ segir í grein Athletic.

Frammistöður Gylfa Þórs það sem af er leiktíð eru töluvert betri en á þeirri síðustu þar sem hann fékk ekki beint að njóta sín í 4-4-2 leikkerfi Carlo Ancelotti.

Þó ýmsir stuðningsmenn Everton ytra séu ekki alltaf par sáttir við Gylfa þá hefur hann alltaf spilað stóra rullu síðan hann kom til Everton. Hann hefur farið í gegnum fjölda stjóra á þeim tíma en alltaf er hann mikilvægt púsl í liði þeirra.

Eftir æfingaleik gegn Blackpool fyrir tímabil – þar sem Gylfi Þór skoraði frábært aukaspyrnumark – þá sagði hann að Ancelotti væri að prófa hann sem djúpan miðjumann. Ítalinn hélt áfram að færa Gylfa sem spilaði í nánast öllum mögulegum stöðum á miðjunni áður en tímabilið hófst.

Á endanum virðist Anelotti hafa komist að því að Gylfi Þór sé best nýttur sem „tía“ eða í holunni á bakvið framherja liðsins. Það hefur svo sannarlega gengið vel til þessa og Everton-liðið blómstrað með Gylfa sem einn af betri leikmönnum liðsins.

Brian McDermott, sem þjálfaði Gylfa Þór hjá Reading í upphafi ferilsins er mikill aðdáandi íslenska miðjumannsins.

„Frábær strákur, alveg eins og faðir sinn. Mikill atvinnumaður. Hann var alger fyrirmynd á öllum sviðum. Við þurfum að draga hann af æfingavellinum þegar við áttum leik daginn eftir því hann var að æfa aukaspyrnur,“ sagði McDermott.

„Hann er ásamt Ian Hart [fyrrum leikmaður Leeds United] besti leikmaður sem ég hef séð taka föst leikatriði. Þeir æfðu út í eitt. Tæknilega séð er hann er frábær. Þú myndir kaupa hann bara út af því hversu góður hann er að taka föst leikatriði, hann getur sett boltann þangað sem hann vill. Hann öskrar ekki heldur sýndir fordæmi. Hann hagar sér eins og fyrirliði á æfingasvæðinu. Hann er hugsuður,“ bætti McDermott við.

Nigel Gibbs er annar sem vann með Gylfa hjá Reading. Hann notar hann enn sem fyrirmynd fyrir yngri leikmenn liðsins.

„Að fara í gegnum sendingaræfingar getur verið frekar leiðinlegt til lengdar en Gylfi gaf sig alltaf allan í hverja æfingu. Hann vissi hversu mikilvægt það væri að festa þetta í vöðvaminninu. Þessir litlu hlutir skipta miklu máli og ég nota hann enn sem dæmi í dag.“

„Meira að segja þegar hann spilaði sem djúpur miðjumaður hjá Everton – sem er ekki hans besta staða – þá gerði hann það því hann vissi að þjálfarinn þyrfti á honum að halda í þeirri stöðu. Hann hefur reynt að gera það sem hann var beðinn um.“

„Það kemur mér ekki á óvart að hann hafi komið til baka eftir að hafa átt erfitt uppdráttar. Þjálfarinn mun elska hann út af hugarfarinu hans. Meira að segja þegar hann var ungur þá gat hann meðtekið allar þær upplýsingar sem við gáfum honum. Hann spurði gáfaðra spurninga og gerði það sem þurfti til að standa sig,“ sagði Gibbs og ljóst að Gylfi Þór er í miklum metum hjá þessum 55 ára gamla þjálfara.

Leggur meira á sig en aðrir leikmenn Everton

Gylfi Þór hefur alltaf lagt sig allan fram, æft aukalega og passað upp á mataræðið. Liðsfélagar hans hjá Everton telja að hann sé duglegasti leikmaður liðsins.

Ben Godfrey, varnarmaður Everton, lýsti Gylfa sem besta „slúttara“ sem hann hefur séð. Það er ágætis hrós því þó Godfrey sé ungur að árum þá eru ágætis framherjar í Everton-liðinu í dag. Þar mætti nefna Dominic Calver-Lewin eða Richarlison.

Hjörvar Hafliðason er meðal þeirra sem eru spurðir út í Gylfa í greininni og nefnir hann frábært hugarfar Gylfa sem hefur fylgt honum frá yngri árum. Hjörvar bendir einnig á – líkt og aðrir í greininni – að Gylfi er í raun hinn fullkomni íþróttamaður.

Hann er ekki á baksíðum slúðurblaðanna, hann er ekki á skemmtistöðum, hann er íþróttamaður frá því hann vaknar á morgnana og þangað til hann fer að sofa á kvöldin. Utan vallar fer hann reglulega í golf en meira um einkalíf hans er í raun ekki vitað.

Samningur Gylfa Þórs rennur út sumarið 2022. Hvort hann rói á önnur mið eða verði áfram hjá Everton á eftir að koma í ljós en það er öruggt að sama hver ákvörðunin verður þá mun hún ekki hafa mikil áhrif á frammistöður hans innan vallar. Gylfi er of mikill atvinnumaður til þess.