Hjörtur lék allan leikinn er Brönd­by tryggði sér danska meistara­titilinn

Fyrir lokaumferð dönsku úrvalsdeildarinnar var ljóst að sigur myndi þýða að Bröndby væri meistari. Liðið tók á móti Nordsjælland og var leikurinn jafn framan af fyrri hálfleik. Undir lok hans kom Lasse Vigen heimamönnum yfir og staðan því 1-0 í hálfleik.

Anis Slimane kom heimamönnum í 2-0 á 52. mínútu leiksins og allt ætlaði um koll að keyra í stúkunni en fjöldi áhorfenda var mættur í þeirri von um að sjá Bröndby verða danska meistara í fyrsta sinn í 16 ár.

Leiknum lauk með 2-0 sigri Bröndby og titillinn kominn í hús. Fagnaðarlætin voru svo eftir því.

Mikael Anderson var í byrjunarliði Midtjylland sem vann 4-0 sigur á AGF. Mikal lék allan leikinn á miðju Midtjylland sem hefði orðið meistari hefði Bröndby ekki unnið sinn leik. Jón Dagur Þorsteinsson lék síðustu 18 mínúturnar í liði AGF.