Magnús Scheving biðst afsökunar á ömurlegri orðræðu

Ummælin sem um ræðir lét Magnús falla þegar ofbeldi var rætt í hlaðvarpinu. Þá sagðist hann myndi leysa ofbeldisvandamál heimsins ef hann fengi að velja eitt vandamál til að leysa. Ekkert er athugavert að sjá við þessi ummæli og vonandi eru sem flestir sammála þeim.

Hins vegar fylgdu þeim ummælum önnur og verri ummæli. Þá sagði Magnús: „Of­beldi getur alveg verið þannig að þú ert giftur og við­komandi fær ekki kyn­líf hjá hinum, það getur verið of­beldi.“ 

Magnús sagði einnig að kynsvelti karla af hálfu kvenna gæti verið rót ofbeldisvandans. „Það eru hóru­hús úti um allt, þetta eru ekki hóru­hús fyrir konur þetta eru hóru­hús fyrir karla. Er hugsan­legur mögu­legur að karlar fái ekki nógu mikið kyn­líf?“ lét hann hafa eftir sér og bætti við: „Er það mögu­leiki?, af hverju er þessi eftir­spurn?, eru karlar bara alltaf graðir bara enda­laust og erum við þá komin með lausnina á því af hverju þeir haga sér eins og fá­vitar? Eigum við þá að gelda þá eða hvað eigum við að gera við þá, sprauta þá niður eða hvað er málið?“

Ummælum Magnúsar var vægast sagt ekki tekið vel á samfélagsmiðlum og fann hann sig því knúinn til að gefa út opinbera afsökunarbeiðni.

„Orð mín voru ömurlega sögð“

Í morgun birti Magnús eftirfarandi afsökunarbeiðni á samfélagsmiðlinum Instagram:

„Orð mín voru því miður mjög ömurlega sögð og á því vil ég biðjast afsökunar á.

Í umræddum podcastþætti barst umræðan að vissu màlefni, því miður komu orðin óboðlega út úr mér, heimskulega sagt og vona ég að þessi mistök mín um þetta þarfa màlefni, ofbeldi, sem ég því miður þekki vel sé ekki togað og teygt. Til allra þeirra sem ég kann að hafa sært með orðum mínum vil ég biðjast innilegrar afsökunar.“

Borið hefur á undanfarið að opinberar persónur gefi út afsökunarbeiðnir og er þeim misjafnlega tekið af landanum. Afsökunarbeiðni Magnúsar víkur ekki frá þeirri reglu, en hún hefur ekki fengið góðar viðtökur á samfélagsmiðlum.