Ari hafði bara fengið tólf mínútur en var svo maður leiksins

Ari og félagar gerðu 1-1 jafntefli við Vålerenga og hafa því ekki tapað leik á heimavelli í norsku úrvalsdeildinni í fótbolta í sumar. Gengið á útivelli hefur verið mun verra en Strömsgodset er núna í tólfta sæti af sextán liðum, með tólf stig eftir tíu leiki.

Ari hafði bara fengið að spila 12 mínútur á þessari leiktíð, í leik gegn Bodö/Glimt sem var löngu tapaður þegar Ari kom inn á, þegar hann fékk loks sæti í byrjunarliðinu í gær.

Ari var valinn maður leiksins hjá Strömsgodset. Einn af hápunktum leiksins var þegar að Ari kom til bjargar í seinni hálfleik, eftir að aðstoðardómari missti af því að Henrik Udahl hjá Vålerenga væri rangstæður. Udahl virtist sloppinn aleinn gegn markverði en Ari elti hann uppi og renndi sér í boltann á síðustu stundu.

„Það var gott að geta snúið aftur og spilað 90 mínútur. Ég er ánægður með það. Ég var kannski pínulítið ryðgaður í byrjun en ég er mjög ánægður með hvernig til tókst. Svona er þetta þegar maður hefur svona góða menn með sér í liði til að hjálpa sér að komast inn í þetta,“ sagði Ari í viðtali við heimasíðu Strömsgodset en hann lék við hlið fyrirliðans Gustav Valsvik í leiknum.

Ari kom til Strömsgodset frá Fylki fyrir síðustu leiktíð en ekki náð að festa sig í sessi í liðinu auk þess sem meiðsli hafa sett strik í reikninginn:

„Auðvitað hefur það á vissan hátt verið svekkjandi. [Gustav] Valsvik og Niklas [Gunnarsson] hafa hins vegar verið að spila vel. Þegar ég var ekki að spila vel þá verðskulduðu þeir að spila. Síðan þarf maður bara að vera þolinmóður því það er alltaf erfitt að vera ekki að spila,“ sagði Ari.

Valdimar Þór Ingimundarson, sem kom til Strömsgodset frá Fylki fyrir síðasta tímabil líkt og Ari, sat á bekknum allan leikinn í gær. Hann hefur byrjað fjóra leiki á tímabilinu og alls spilað sjö deildarleiki í sumar.

Viðar Örn Kjartansson er enn frá vegna meiðsla og lék ekki með Vålerenga.