Viðskipti innlent

Vantar fjölda manns til starfa á Austurlandi vegna mikilla anna

Kristján Már Unnarsson skrifar
Stefán Vignisson er framkvæmdastjóri MVA byggingaverktaka. Fyrir aftan er verið að byggja leikskóla.
Stefán Vignisson er framkvæmdastjóri MVA byggingaverktaka. Fyrir aftan er verið að byggja leikskóla. Arnar Halldórsson

Mikil umsvif eru núna í byggingageiranum á Austurlandi og segir framkvæmdastjóri stærsta byggingafélags fjórðungsins að fjölda fólks vanti þar til starfa.

Í fréttum Stöðvar 2 mátti sjá hvar verið er að byggja sjöhundruð milljóna króna leikskóla í Fellabæ, úthverfi Egilsstaða. Þetta er eitt af mörgum verkum MVA byggingaverktaka. Nafnið stendur fyrir Múrverktakar Austurlands og þeir eiga að skila leikskólanum fullbúnum að ári.

„Þriggja deilda leikskóla sem verður mjög góð viðbót fyrir bæjarfélagið,“ segir Stefán Vignisson, framkvæmdastjóri MVA byggingaverktaka.

Frá smíði nýs leikskóla í Fellabæ.Arnar Halldórsson

Þeir byrjuðu þrír í fyrirtækinu árið 2012. Það hefur síðan sameinast öðrum og bætt við starfsemi, síðast með kaupum á steypueiningaverksmiðju VHE í Fellabæ. Starfsmannafjöldinn telur núna tugi manna.

„Við erum í kringum fjörutíu í dag. Gætum verið mun fleiri. Það vantar.. ég kæmi allavega tíu að í viðbót.“

-Er svona mikið að gera á Austurlandi?

„Það er rosalega mikið að gera.“

Þar segir Stefán mestu muna um fjárfestingar í sjávarútvegi.

„Fiskvinnslufyrirtækin bara um alla firði eru að framkvæma. Á Norðfirði, Eskifirði, Fáskrúðsfirði.“

Eskja á Eskifirði er meðal þeirra austfirsku sjávarútvegsfyrirtækja sem eru að byggja.Arnar Halldórsson

Starfssvæðið segir hann stórt.

„Það má eiginlega segja frá Hornafirði og norður á Akureyri.“

Þeir steypa einingar fyrir skógarböðin á Akureyri, á Hornafirði byggðu þeir parhús, á Kópaskeri er það fiskeldisstöð, í Berufirði brú og á Eskifirði flóðvarnir. Og hann segir margt í pípunum.

„Það á eftir að verða gríðarleg uppbygging í fiskeldi hérna. Sjávarútvegurinn er náttúrlega rosalega sterkur í þessum fjórðungi.

Og það er mikil þörf á innviðabyggingum í sveitarfélögunum, bæði í Múlaþingi og hérna í kring.

Þannig að framtíðin er bara mjög björt,“ segir Stefán Vignisson.

Hér má sjá frétt Stöðvar 2:

Fjarðabyggð Vinnumarkaður Sjávarútvegur Fiskeldi

Tengdar fréttir

Síðasta þéttbýli Austurlands tengist brátt bundnu slitlagi

Endurbygging fimmtán kílómetra vegarkafla á Fljótsdalshéraði í átt til Borgarfjarðar eystra markar þáttaskil í samgöngumálum Austurlands. Þegar malbikun vegarins lýkur verða allir þéttbýlisstaðir fjórðungsins tengdir bundnu slitlagi.

Árnar á Eskifirði hamdar með steyptum stokkum

Fimm ár sem renna í gegnum Eskifjarðarbæ eru að missa náttúrulega farvegi sína og flæða í framtíðinni um steypta stokka, með framkvæmdum sem kosta vel á þriðja milljarð króna. Tilgangurinn er að verja byggðina fyrir ofanflóðum.

Stórfelld uppbygging seiðaeldis við Kópasker

Einhver mesta uppbygging í sögu Öxarfjarðar fer nú fram við Kópasker. Þar er risin 2.400 fermetra bygging sem fullyrt er að sé stærsta hús í sögu héraðsins.

Ferðamennirnir héldu verksmiðju gangandi

Hröð uppbygging gistirýmis hefur reynst happafengur fyrir byggingariðnaðinn og er helsta ástæða þess að einu steypueiningaverksmiðju Austurlands tókst að þreyja þorrann.

Héraðsbúar buðu lægst í Berufjörð

Tilboð í að ljúka gerð hringvegarins um Berufjarðarbotn voru opnuð hjá Vegagerðinni í dag. Fjögur tilboð bárust og var það lægsta upp á 843 milljónir króna.



Mest lesið


Fleiri fréttir

Sjá meira


×

Mest lesið