Vona að skýr skila­boð smitrakningar­teymisins skili eðli­legu skóla­starfi eftir helgi

1.340 einstaklingar eru í sóttkví á Norðurlandi eystra vegna 106 greindra tilfella Covid-19, langflestir á Akureyri.

Segir aðgerðirnar hafa skipt máli

Komið hefur fram að meginhluti þeirra sem greinst hafa með Covid-19 á Akureyri undanfarna daga séu börn á grunnskólaaldri. Þetta hefur sett sinn svip á skólastarfið í bænum að undanförnu, mismikið eftir skólum þó.

„Þetta er búið að vera áskorun og það er búið að mæða mikið á starfsfólki skólans og okkur stjórnendum að skipuleggja þetta. Ég hef fellt niður að meðaltali tvær kennslustundir á dag frá því á mánudaginn. Ég held úti kennslu til tólf og svo felli ég niður vegna þess að ég hef ekki starfsfólkið,“ segir Bryndís Björnsdóttir, skólastjóri Naustaskóla.

Þar fóru 158 nemendur og töluverður fjöldi starfsfólks, 23, í sóttkví vegna þriggja nemenda sem greindust með Covid-19.

Bryndís segir ljóst að sóttkvíin sé að hafa tilætluð áhrif. Tíu nemendur skólans hafi greinst með Covid-19, eftir að hafa verið settir í sóttkví.

„Sem segir okkur að þessar aðgerðir skipta máli,“ segir Bryndís en þar eru nemendur í fjórða til sjöundi bekk í sóttkví.

Hún reiknar hins vegar með að flestir snúi til baka í vikunni.

„Þau voru öll í sóttkví fram á fimmtudag og þau eru að fara í sýnatöku á morgun. Ég vænti þess að hafa bara fullmannað hús á föstudaginn,“ segir Bryndís.

Skilaboðin voru skýr

Svipað er uppi á teningnum í Brekkuskóla þar sem um 130 börn eru í sóttkví og nokkrir starfsmenn. Þar segir skólastjórinn Jóhanna María Agnarsdóttir aðeins þurft að hafa fellt niður nokkra tíma í vikunni.

Nokkur umræða hefur skapast um þann mikla fjölda einstaklinga sem sendur var í sóttkví á Akureyri. Jóhanna segist hafa fengið skýr skilaboð frá smitrakningarteminu um hvað ætti að gera til að stemma í stigu við frekari smit.

„Við fengum bara mjög skýr skilaboð frá smitrakningarteyminu eftir þessari reglu að ef þú ert í fimmtán mínútur eða meira í nánum samskiptum við viðkomandi barn þá er það sóttkví annars sleppa menn í smitgát,“ segir Jóhanna María.

Þetta skýri meðal annars þennan mikla fjölda sem sendur hefur verið í sóttkví.

„Einn smitaður í árgangi, ef að hann hefur verið að fara á milli þá er hann kannski að taka út með sér fjöruíu, fimmtíu, jafn vel sextíu börn,“ segir Jóhanna María.

Hún reiknar með að skólastarfið komist í samt horf í næstu viku, meirihluti þeirra sem er í sóttkví fari í skimum á morgun og föstudag. Þeir sem fá neikvætt svar losna úr sóttkví.

„Við treystum því að næsta vika verði nokkuð eðlileg, við vonum það og að þá séum við búin að komast fyrir þetta hérna á Akureyri.“

Breyta í spaða og aðlagast

Starfsfólk, nemendur og foreldrar í Lundarskóla hafa einnig glímt við afleiðingar hópsýkingarinnar á Akureyri. Elías Gunnar Þorbjörnsson skólastjóri segist hafa fengið sömu skilaboð og kollegi hans í Brekkuskóla frá smitrakningarteyminu.

„Vegna þess að þetta var að blossa upp í skólunum og það er svo erfitt að halda utan um þetta, þau eru að hittast svo víða. Bara hingað og þangað. Alls konar íþróttaæfingum, félagsstarfi, á milli skóla og svo líka innan skóla,“ segir Elías.

Því var ekki annað hægt en að fylgja ráðleggingum smitrakningateymisins.

„Þetta er fljótt að breiðast út ef einhver mætir í skólann smitaður. Þau ákváðu að við myndum frekar taka þessu viku og senda allan árganginn ef það kæmi smit og við höfum bara fylgt ráðleggingum smitrakningarteymisins,“ segir hann.

Lundarskóli er því hálf tómlegur þessa dagana þar sem megnið af fyrsta til þriðja bekk og allur sjöundi og níundi bekkur er í sóttkví, og mögulega er sjötti bekkur einnig á leið í sóttkví.

„Í gær voru þeir 166 sem við vorum búin að senda í sóttkví. Svo er möguleiki að það fari einn árgangur frá og með gærdeginum, við erum að bíða eftir staðfestingu á því,“ segir Elías.

Við þetta bætast fimmtán starfsmenn skólans, sem óneitanlega hefur sett sinn svip á skólastarfið. Skólinn er hálftómur að sögn Elíasar.

„Við þurfum bara að breyta í spaða og aðlaga okkur. Við bara gerum það,“ segir Elías

 Reiknar hann með að skólastarfið verði komið í svipað horf og áður í næstu viku.

„Þeir sem fóru í sóttkví í síðustu viku, þeir fara í próf núna á fimmtudaginn og föstudaginn og fara inn í skólann í næstu viku ef ekkert stórt gerist. Vonandi sjáum við nú bara fyrir endann á þessu.“