Gæti komið til rýminga á Seyðisfirði vegna rigninga

Þetta kemur fram í tilkynningu frá Almannavörnum. Búist er við mikilli úrkomu á Austfjörðum aðfaranótt mánudags og fram á miðvikudagsmorgunn. Aukin ákefð er í spánni upp úr hádegi á mánudag og helst hún fram á hádegi á þriðjudag. Þá má búast við hvassri austan eða norðaustanátt. 

„Uppsöfnuð úrkoma gæti orðið 100-200 mm. Af þessum sökum gæti komið til rýmingar í húsum undir Botnabrún á Seyðisfirði einkum í nágrenni við stóra skriðusárið. Ekki er orðið ljóst hversu viðamikil sú rýming yrði og verður tekin ákvörðun um framhaldið um miðjan dag næstkomandi sunnudag,“ segir í tilkynningunni frá Almannavörnum. 

Fólk er beðið um að fylgjast vel með veðurspá og fréttatilkynningum á sunnudag.