Góð frammistaða Elísu hjálpaði Natöshu að fá tækifæri í landsliðinu

Ísland mætir Japan í vináttulandsleik í Hollandi 25. nóvember og svo Kýpur á útivelli 30. nóvember í undankeppni HM.

Ef Valskonan Ída kemur við sögu í öðrum leikjanna verður það fyrsti A-landsleikur þessarar 19 ára knattspyrnukonu. Foreldrar hennar, Hermann Hreiðarsson og Ragna Lóa Stefánsdóttir, léku samtals 124 A-landsleiki.

„Ída spilaði náttúrulega vel í sumar. Við þurfum líka að skoða leikmenn og gefa fleirum tækifæri til að stækka kökuna sem við höfum úr að velja, svo við séum með rétta mynd af þeim leikmönnum sem koma til greina,“ sagði Þorsteinn Halldórsson landsliðsþjálfari þegar hann útskýrði valið á Ídu og Natöshu á blaðamannafundi í dag.

Natasha fékk íslenskan ríkisborgararétt árið 2019 og hefur spilað tvo leiki fyrir Ísland, báða á æfingamóti á Spáni vorið 2020. Segja má að frábær frammistaða Elísu Viðarsdóttur í stöðu vinstri bakvarðar í síðasta landsleik hafi opnað pláss fyrir Natöshu inn í hópinn því þar með var þörfin minni fyrir Hafrúnu Rakel Halldórsdóttur.

Verið mjög nálægt því að vera valin

Natasha hefur leikið á Íslandi frá árinu 2014, fyrst með ÍBV og svo Keflavík frá árinu 2017, og er nú orðin leikmaður Breiðabliks. Þorsteinn, sem er fyrrverandi þjálfari Breiðabliks, hló léttur í bragði aðspurður hvort koman til Breiðabliks hefði gert gæfumuninn fyrir Natöshu:

„Hún hefur alltaf verið mjög nálægt því að vera valin. Ég ætlaði að velja hana síðast en hætti við það á síðustu stundu og tók frekar Hafrúnu Rakel með sem vinstri bakvörð. Ég var ekki viss um að Elísa myndi leysa stöðu vinstri bakvarðar eins vel og hún gerði,“ sagði Þorsteinn en Elísa átti stórleik og þrjár stoðsendingar í 5-0 sigri Íslands gegn Kýpur í síðasta mánuði.

„Reyndar var Hafrún góð í verkefninu hjá okkur og líka góð í Meistaradeildinni [með Breiðabliki] í vikunni. Ég veit alveg hvað hún getur en ég ákvað að taka Natöshu inn til að skoða hana frekar og gefa henni tækifæri til að sýna hversu langt hún er komin,“ sagði Þorsteinn sem hefur minni þörf fyrir Hafrúnu þar sem að Hallbera Guðný Gísladóttir og nú Elísa hafa sannað gildi sitt í stöðu vinstri bakvarðar. Natasha er skiljanlega ekki hugsuð sem vinstri bakvörður:

„Hún getur spilað sem miðvörður, aftasti varnarmaður og hægri bakvörður. Ég horfi ekki á hana sem vinstri bakvörð, og væntanlega er Elísa meira þar eftir allar fyrirgjafirnar í síðasta leik.“

Fjórar ekki til taks vegna meiðsla

Þorsteinn sagði fjóra leikmenn ekki hafa komið til greina að þessu sinni vegna meiðsla:

„Elín Metta [Jensen] er enn meidd og ekki farin að geta æft að fullu. Áslaug Munda [Gunnlaugsdóttir] er enn frá vegna höfuðhöggsins [í september] en vonandi hægt og rólega að ná sér. Berglind Rós [Ágústsdóttir] er meidd og Hlín Eiríks einnig en verður vonandi ekki lengi frá.“