Eric Abidal verður yfirheyrður vegna árásarinnar á Hamraoui

Í síðustu viku drógu tveir grímuklæddir menn Hamraoui út úr bíl fyrir utan heimili hennar í París og börðu hana með járnrörum í fæturna.

Samherji Hamraouis hjá PSG, Aminata Diallo, sem var með henni í bílnum, var handtekin og yfirheyrð vegna gruns um að hafa skipulagt árásina. Henni var seinna sleppt án ákæru.

Spjótin hafa beinst að fyrrverandi kærasta Hamraouis. Allavega fjórir samherjar hennar fengu símtöl frá honum þar sem hann fór ófögrum orðum um hana og sagði hana hafa eyðilagt líf hans.

Nýjustu vendingarnar í málinu eru þær að Abidal verður yfirheyrður. Saksóknari greindi frá þessu í gær. Eiginkona Abidals, Hayet, gæti einnig verið kölluð til yfirheyrslu.

Lögreglan hefur komist að tengslum milli Hamraouis og Abidals en hún hringdi í hann um morgunin sama dag og árásin átti sér stað. 

Abidal lék með Barcelona á árunum 2007-13 og var seinna íþróttastjóri félagsins um tveggja ára skeið, meðal annars þegar Hamraoui gekk til liðs við Barcelona. Abidal var rekinn sem íþróttastjóri Barcelona eftir að karlalið félagsins tapaði 8-2 fyrir Bayern München í Meistaradeild Evrópu sumarið 2020.

Hamraoui er enn að jafna sig á árásinni og var ekki með PSG þegar liðið steinlá fyrir Lyon, 6-1, í toppslag frönsku úrvalsdeildarinnar á sunnudaginn. Diallo var einnig fjarri góðu gamni en hún ku vera í miklu áfalli eftir árásina á Hamraoui og eftirmála hennar.