Spacey dæmdur til að greiða fram­leið­endum Hou­se of Cards fjóra milljarða

Lítið hefur sést til Spacey eftir að hann var sakaður um kynferðisbrot árið 2017 en hvað varðar framleiðslu hinna gríðarvinsælu House of Cards var hann sagður hafa sýnt ósæmilega hegðun við tökur með óvelkomnum snertingum og óviðeigandi ummælum.

MRC og Netflix brugðust að lokum við með því að skrifa persónu Spacey úr þáttunum, sem forsvarsmenn fyrirtækjanna segja hafa valdið þeim miklum fjárhagslegum skaða, þar sem búið var að leggja línur fyrir næstu og síðustu seríu þáttanna.

Aðilar samþykktu að fara með málið fyrir gerðardóm, sem hlýddi á vitnisburð fleiri en 20 einstaklinga í átta daga. Niðurstaða í málinu lá fyrir síðasta haust en í gær var hún gerð opinber þegar MRC fór þess á leit að dómstóll í Los Angeles staðfesti niðurstöðuna.

Spacey, sem hefur ávallt neitað sök, áfrýjaði málinu á sínum tíma en án árangurs.

Meðal þeirra sem hafa sakað Spacey um kynferðisbrot eru leikarinn Anthony Rapp, sem sagði Spacey hafa reynt að hafa við sig kynmök þegar Rapp var aðeins 14 ára gamall. Meint brot Spacey eru fleiri en hann hefur aldrei verið sakfelldur.

BBC greindi frá.