Lögreglan biðst afsökunar á að hafa orðið fótboltamanni að bana

Atkinson lést 15. ágúst 2016 eftir að lögreglumaðurinn Benjamin Monk skaut hann með rafbyssu í rúmlega hálfa mínútu og sparkaði tvisvar í höfuð hans meðan hann lá í jörðinni. Atkinson var 48 ára þegar hann lést.

Í júní á þessu ári var Monk sakfelldur fyrir að hafa orðið Atkinson að bana. Hann varð þar með fyrsti lögreglumaðurinn í þrjá áratugi sem var sakfelldur fyrir að hafa orðið manni að bana í varðhaldi.

Fjölskylda Atkinsons var afar ósátt við hversu langan tíma það tók að dæma Monk. Þau sögðu jafnframt að málið sýndi þörfina fyrir breytingu á því hvernig lögreglan og réttarkerfið kæmi fram við svart fólk.

Pippa Mills, lögreglustjóri í West Mercia, hefur nú sent fjölskyldu Atkinsons bréf þar sem hún biðst innilegrar afsökunar á gjörðum Monks sem hún segir að séu ekki í neinum takti við það sem lögreglan stendur fyrir og hafi skiljanlega rýrt trausts almennings á störfum hennar.

„Ég get ekki ímyndað mér sársaukann sem þið hafið upplifað og hvernig tafirnar á málarekstrinum hafi aukið á vanlíðan ykkar. Þið hafið sýnt mikinn styrk og mikla reisn undanfarin fimm ár,“ sagði meðal annars í bréfi Mills til fjölskyldunnar.

Atkinson er hvað þekktastur fyrir tíma sinn hjá Aston Villa. Hann lék 85 leiki fyrir félagið og skoraði í þeim 25 mörk. Atkinson varð deildabikarmeistari með Villa 1994 og skoraði í úrslitaleiknum gegn Manchester United.