Stress vegna EM-undirbúnings Íslands og leikmenn hugsanlega lokaðir inni

„Við viljum alls ekki fá smit í hópinn. Þá getum við lent í miklum vandræðum,“ segir Róbert Geir Gíslason, framkvæmdastjóri HSÍ. Leikmennirnir tveir sem eru smitaðir ættu að vera klárir í slaginn þegar landsliðið kemur saman 2. janúar.

Róbert og félagar hjá HSÍ leita nú leiða til að draga sem mest úr smithættu á meðan á undirbúningi fyrir EM stendur. Ljóst er að leikmenn fara í smitpróf að minnsta kosti annan hvern dag, nær allan janúarmánuð.

Liðið hugsanlega í vinnustaðasóttkví

„Ég verð að viðurkenna að þetta er ekki þægileg tilfinning. Það eru rétt rúmar tvær vikur þar til að við förum til Ungverjalands [á EM] og við erum að skoða það núna hvernig við munum haga undirbúningnum hér heima.

Við erum að skoða hvort við eigum hreinlega að fara með liðið í vinnustaðasóttkví. Loka það að sem mestu inni. Við æfum 2.-11. janúar hér heima og ástandið hér heima fer náttúrulega versnandi eins og alþjóð veit, svo það er smá stress núna yfir því hvernig við eigum að standa að þessu,“ segir Róbert við íþróttadeild.

Við árlegan undirbúning sinn fyrir stórmót hafa íslensku landsliðsmennirnir ekki verið á hóteli þegar þeir dvelja hér á landi, heldur í eigin húsnæði eða hjá sinni fjölskyldu. Nú er til skoðunar að HSÍ komi hópnum fyrir á hóteli, í vinnustaðasóttkví eins og fyrr segir.

„Það er eitt af því sem við verðum að skoða. Við sjáum bara hvað hefur gerst hjá Frökkum þar sem níu leikmenn eru smitaðir, og þeir eiga að byrja að æfa í dag [í gær]. Því nær móti sem leikmenn smitast því erfiðara verður að manna hreinlega liðið.“

Smitpróf að minnsta kosti annan hvern dag

Leikmenn, þjálfarar, Róbert og aðrir sem að íslenska landsliðinu koma þurfa að fara í fjölmörg smitpróf næsta mánuðinn, í von um að hugsanlegt smit breiðist ekki út.

„Við byrjum allir á prófi þegar við komum saman og förum líklegast í fjögur PCR-próf hér heima, fyrir 11. janúar, og á meðan á EM stendur er að lágmarki prófað annan hvern dag. Það má því reikna með að frá því að við hittumst og út janúar verði menn í prófum annan hvern dag,“ segir Róbert.