Jónatan: Vonandi erum við ekki hættir í svona leikjum

„Það var mjög lítið sem skildi á milli. Mér fannst þetta vera jafn leikur og mér finnst við spila vel. Við vitum að Valsarar eru frábærir og á góðu skriði en við vorum líka frábærir. Það voru nokkur atriði í sókninni í lokin sem skildu á milli,“ sagði Jónatan í samtali við Vísi eftir leik.

„Vörnin var ekki alveg nógu góð en á sama tíma ætluðum við að keyra á þá. Ég er gríðarlega svekktur að hafa ekki unnið því við gerðum svo sannarlega tilkall til þess. Ég er stoltur af mínum mönnum að hafa lagt ótrúlega mikið í þennan leik. Vonandi er þetta það sem koma skal, að við séum í þessum stóru leikjum.“

Þetta var fyrsti bikarúrslitaleikur KA í átján ár og stuðningsmenn liðsins fjölmenntu á Ásvelli. Jónatan vonar að þetta sé byrjunin á einhverju meira hjá KA-mönnum.

„Það var rosalegur dagur og það hefði verið enn betra ef við hefðum unnið. Þetta er eitthvað til að byggja á og vonandi erum við ekki hættir í svona leikjum,“ sagði Jónatan.

„Það þarf að leggja mikla vinnu í þetta en ég vona að það verði ekki svona langt í næsta alvöru leik. Núna þurfum við bara að koma okkur í þá stöðu að fá fleiri svona leiki.“