Sam­þykkja að Fujimori skuli sleppt úr fangelsi

Dómstóllinn hefur ákveðið að hinn 83 ára Fujimori skuli sleppt vegna mannúðarsjónarmiða, en hann hefur glímt við bága heilsu um árabil.

Af sex dómurum við réttinn voru þrír á því að sleppa Mujimori úr haldi og þrír voru því andsnúnir. Séu atkvæði dómara jöfn er það atkvæði forseta dómstólsins sem ræður úrslitum. Um er að ræða æðsta dómstól Perú og því er ekki hægt að áfrýja málinu.

Fujimori gegndi embætti forseta Perú á árunum 1990 til 2000 og var dæmdur í tengslum við tvær árásir herdeilda árið 1991 og 1992. Alls létu 25 manns lífið í aðgerðunum, þar af eitt barn, sem sagðar voru beinast gegn hryðjuverkasamtökum. Í forsetatíð sinni greip Fujimori til harðra aðgerða gegn vinstrimönnum í landinu.

Fujimori flúði til Japans, heimalands foreldra sinna, eftir að hann lét af embætti, en var svo sakfelldur í fjarveru sinni og framseldur til Perú árið 2007.

Vinstrimaðurinn Pedro Castillo, forseti Perú, segir ákvörðun stjórnlagadómstólsins nú sýna fram á „stofnanalega krísu“ í landinu og hvatti alþjóðlega dómstóla til að bregðast við. Castillo hafði betur gegn dóttur Fujimori, Keiko Fujimori, í forsetakosningunum á síðasta ári.