Xavi hefur breytt öllu hjá Barcelona á aðeins 134 dögum

Síðustu vikur hefur Barcelona spilað miklu skemmtilegri og árangursríkari fótbolta en undanfarin misseri. Þessi ný leikstíll Börsunga hefur auðvitað fengið viðurnefnið Xavi-bolti eftir þjálfaranum sem tók við liðinu 6. nóvember síðastliðinn.

Nauðsynleg upprisa

Upprisa Barcelona liðsins undir stjórn Xavi Hernández hefur verið afar nauðsynleg fyrir þetta fornfræga félag sem hefur mátt upplifa vandræðalega tíma innan sem utan vallar. Slæm fjárhagsstaða hefur jafnoft stolið fyrirsögnunum og slæm töp. Það má síðan ekki gleyma því að félagið leyfði Lionel Messi að yfirgefa félagið sitt á frjálsri sölu í haust.

Líkt og Xavi Hernández tók stjórnina á miðjunni í gullaldarliði Barcelona undir stjórn Pep Guardiola var hann frekar fljótur að ná stjórninni þegar hann mættu aftur á Nývang.

Hann tók agamálin upp á allt annað stig og hafði auðvitað mikla virðingu frá bæði leikmönnum og stjórnarmönnum. Allir í Barcelona elska Xavi og elska hann ekkert minna sem knattspyrnustjóra liðsins. Mesta breytingin er auðvitað á leikstíl liðsins því Barcelona liðið er að spila miklu opnari og beittari bolta síðan hann settist í þjálfarastólinn.

Xavi hefur í raun breytt öllu, hvort sem það er andrúmsloftið, taktíkin, leikmannakaup, samband við leikmenn og stjórn. Hann kórónaði þetta breytingaferli með því að stimpla Barcelona aftur í hóp bestu liðanna með því að rúlla upp Real Madrid í El Clásico.

Tveir erfiðir mánuðir

Það tók samt vissulega tvo mánuði að snúa við skútunni og þá veltu kannski margir fyrir sér að verkefnið væri jafnvel of stórt fyrir ekki reynslumeiri mann. Nú 134 dögum síðar efast líklega enginn lengur.

Frá og með febrúar þá hefur Xavi komið Barcelona liðinu á fullt skrið og gott dæmi um það eru 4-2 sigur á Atlético Madrid 6. febrúar, 4-1 sigur á Valencia 20. febrúar, 4-2 sigur á Napoli 24. febrúar í Evrópudeildinni, 4-0 sigur á Athletic Bilbao 27. febrúar, 4-0 sigur á Osasuna 13. mars og loks 4-0 sigur á Real Madrid í fyrsta El Clásico Xavi í deildinni sem þjálfari.

Eins og sjá má á þessari upptalningu þá er Barcelona ekki bara að vinna alla þessa leiki heldur er liðið að gera það með því að skora fullt af mörkum og vinna bestu liðin sannfærandi.

„Við náðum að breyta neikvæðri reynslu okkar eftir að hafa tapað síðustu Clasico-leikjum. Við höfum sannað það að við getum keppt við bestu lið heims. Ég veit ekki hvort við getum unnið titilinn en við útilokum ekki neitt. Kannski erum við aðeins of seint á ferðinni en þetta var mjög stór sigur fyrir okkur,“ sagði Xavi Hernández eftir leikinn.

Þessi úrslit geta bara hjálpað

„Ég er mjög stoltur af mínu liði. Þetta var El Clasico og þessi úrslit geta bara hjálpað okkur í framhaldinu. Það er samt enn mikið verk fyrir höndum,“ sagði Xavi.

Barcelona liðið var í tómu tjóni undir stjórn Hollendingsins Ronald Koeman og eftir fyrsta tap liðsins í nítján ár á móti Rayo Vallecano í hans síðasta leik í lok október þá sátu Börsungar í níunda sæti spænsku deildarinnar.

Meistaradeildardraumurinn dó eftir að Xavi tók við enda voru fyrstu mánuðir hans erfiðir. Liðið hefur á móti blómstrað í Evrópudeildinni þar sem liðið er komið í átta liða úrslitin. Liðið er einnig komið upp í þriðja sæti í deildinni. Barcelona liðið er vissulega enn tólf stigum á eftir toppliði Real Madrid en á einn leik inni á erkifjendur sína. Liðið hefur enn fremur fengið átta fleiri stig í síðustu fimm leikjum sínum en Sevilla á sama tíma. Sevilla er í öðru sæti.

Kemur honum ekkert á óvart

„Xavi kemur mér ekki á óvart,“ sagði Javier Saviola, fyrrum leikmaður Real Madrid og Barcelona. Hann sá strax þjálfarann í Xavi þegar þeir spiluðu saman í liði Barcelona.

„Við sáum strax að hann hafði hæfileikana til að ná tökum á fræðunum sem eru svo flókin fyrir sumar. Hann hafði þessa taktísku sýn og sýndi það með því að staðsetja leikmennina fyrir framan sig. Við sáum þetta strax,“ sagði Saviola.

„Hann hefur gefið Barcelona nýtt andlit. Nýju leikmennirnir hafa þó verið mjög mikilvægir. Þeir hafa styrkt Barcelona liðið mikið og þeir eru allir að spila á háu getustigi,“ sagði Saviola.

Einn af þessum nýju leikmönnum er auðvitað, Pierre-Emerick Aubameyang, fyrrum fyrirliði Arsenal. Barcelona fékk hann á frjálsri sölu úr frystinum á Emirates og hann hefur skoraði níu mörk í fyrstu ellefu leikjum sínum með félaginu. Í gær var  Aubameyang með tvö mörk og eina stoðsendingu í stórsigrinum á Real. 

Barcelona fékk líka menn eins og Ferran Torres, Adama Traoré (á láni) og Dani Alves í janúarglugganum. Liðinu tókst að styrkja sig vel og það hefur einnig hjálpa Xavi mikið. Það þurfti hins vegar nýja hugsun og nýja hugsjón á Nývangi og þar er að nægu að taka hjá Xavi.

Þá má ekki gleyma hvað hann hefur gert fryir Ousmane Dembélé. Dembélé var nánast útskúfaður úr félaginu en hefur blómstrað undir stjórn Xavi. Dembélé átti meðal annars tvær stoðsendingar í gær og hefur gefið sjö slíkar á árinu 2022 sem er það mesta í fimm stærstu deildum Evrópu.

Verðum að sýna þolinmæði

„Við verðum samt að sýna honum þolinmæði. Ég tel að hann sé rétti stjórinn því hann fæddist hjá félaginu. Hann þekkir Barcelona heimspekina og hefur án efa allt það sem þarf til að ná árangri hjá Barcelona,“ sagði Saviola.

Fyrsti leikur eftir landsleikjahlé verður einmitt á móti Sevilla og þar geta Börsungar tekið annað sætið af Andalúsíumönnum. Svo er komið að átta liða úrslitum Evrópudeildarinnar á móti þýska liðinu Eintracht Frankfurt en í þeirri keppni liggja kannski mestu möguleikar Xavi á að vinna stóran titil á sínu fyrsta tímabili með Barcelona liðið.