Sigursteinn framlengir við FH fyrir fyrsta leik í úrslitakeppninni

Sigursteinn tók við FH af Halldóri Sigfússyni sumarið 2019. FH var í 2. sæti þegar tímabilið 2019-20 var blásið af vegna kórónuveirufaraldursins. Á síðasta tímabili endaði FH einnig í 2. sæti og féll naumlega úr leik fyrir ÍBV í átta liða úrslitum úrslitakeppninnar.

FH-ingar enduðu í 4. sæti Olís-deildarinnar í vetur og mæta Selfyssingum í átta liða úrslitum. Fyrsti leikur liðanna fer fram í Kaplakrika klukkan 19:30 í kvöld.

„Það er mjög ánægjulegt að vera búin að tryggja okkur starfskrafta Steina til næstu ára. Það hafa verið mjög krefjandi aðstæður síðastliðin ár og Steini staðið sig gríðarlega vel sem skipstjóri FH skútunnar.Það eru spennandi tímar framundan og FH ætlar sér að vera áfram í fremstu röð innan vallar sem utan, hér eftir sem hingað til,“ sagði Ásgeir Jónsson, formaður handknattleiksdeildar FH, eftir undirskrift dagsins.

Sigursteinn kemur úr mikilli FH-fjölskyldu og lék með félaginu á sínum tíma. Þá hefur hann þjálfað hjá FH sem og yngri landslið Íslands. Sigursteinn kveðst ánægður að halda starfi sínu hjá FH áfram.

„Ég er fullur tilhlökkunar að halda áfram á því ferðalagi sem við höfum verið á síðustu ár. Leikmannahópurinn er góður, metnaðarfullur og það er alltaf stefnt að sigri í öllu því sem liðið tekur sér fyrir hendur. Umgjörðin í kringum liðið góð þar sem leikmenn, þjálfarateymi, stjórnarmenn og sjálfboðaliðar vinna markvist að því að FH sé að berjast á toppnum í íslenskum handbolta eins og FH á að vera gera,“ sagði Sigursteinn. 

„Árangurinn og stöðuleikinn hefur verið góður síðustu ár þar sem ávallt er leitast við að bæta sig og taka næstu skref fram á við og á það bæði við innan sem utan vallar. Allt í allt mjög eftirsóknarvert umhverfi að starfa í og því var það aldrei spurning í mínum huga að ég vildi halda ferðalaginu áfram.“