Haukarnir hafa þrisvar lent í þessu frá 2003 og komist aftur heim í öll skiptin

Þetta er ekki í fyrsta skiptið sem Haukarnir lenda í slíkri stöðu því þeir byrjuðu líka svona í úrslitakeppnunum 2003, 2008 og 2017.

Í öllum þremur einvígunum tókst Haukamönnum að koma einvíginu aftur heim og þar með í oddaleik á Ásvöllum. Þeir unnu tvo af þessum þremur oddaleikjum en sá síðasti tapaðist á móti Fram 2017 eftir vítakastkeppni.

Staðan var þá jöfn (32-32) eftir venjulegan leiktíma en það dugði heldur ekki að framlengja tvisvar því staðan var 37-37 eftir fyrstu framlengingu og 43-43 eftir aðra framlengingu. Vítakastkeppni réð því úrslitum í þessum magnaða leik. Haukarnir klúðruðu tveimur vítum en Framarar aðeins einu.

Í hin tvö skiptin sem Haukarnir hafa verið í þessari erfiðu stöðu þá tókst þeim að snúa við blaðinu og gott betur. Árin 2003 og 2008 unnu Haukarnir ekki aðeins oddaleikinn því þeir urðu á endanum Íslandsmeistarar þrátt fyrir að hafa byrjað úrslitakeppnina á tapi á heimavelli.

Það sem gerir þessa stöðu svo hættulega er að það þarf bara að vinna tvo leiki í átta úrslitunum og leikur tvö er á erfiðum útivelli.

Það þarf því að fara allar götur aftir til ársins 2010 til að vinna lið sem komst áfram eftir að hafa tapað leik eitt í einvígi þar sem þarf bara að vinna tvo leiki. Valsmenn unnu þá Akureyri í oddaleik.