„Það verða engar yfirlýsingar frá mér að þessu sinni gegn ÍBV“

„Þetta var rosalega jafnt einvígi, það er mikil samstaða í okkar liði og mörkin dreifast á marga menn. Við vorum ósáttir að tapa fyrsta leik þar sem við vorum kærulausir undir lokin en í kvöld stóðum við allir saman,“ sagði Heimir Óli og hrósaði Stefáni Huldar og Adam Bamruk fyrir sitt framlag.

Heimir hélt áfram að hrósa samstöðu liðsins og fannst honum liðsheildin standa upp úr.

„Mér fannst samstaðan standa upp úr, Adam var markahæstur en annars dreifðust mörkin á marga. Það breytir engu máli þótt þú gerir mistök hjá okkur maður fær alltaf klapp á bakið og málið er dautt.“

Haukar komust fjórum mörkum yfir þegar tæplega tíu mínútur voru eftir en KA kom til baka og fékk tækifæri til að jafna leikinn.

„KA er með frábært lið og það er ótrúlegt að þetta lið hafi endað í sjöunda sæti en við unnum leikinn og það er það eina sem stendur upp úr.“

Haukar mæta ÍBV í undanúrslitum. Liðin áttust við í undanúrslitum 2019 þar sem allt sauð upp úr í einvíginu og var mikið um yfirlýsingar frá báðum liðum vegna höfuðmeiðsla Heimis Óla.

„Ég vona að það verða engar yfirlýsingar í þessu einvígi, þetta er allt menn sem maður þekkir og góðir vinir manns. Það verður hart barist í einvíginu en það verða engar yfirlýsingar frá mér,“ sagði Heimir Óli Heimisson að lokum léttur.