Ekkert lið byrjað undanúrslitin með slíkum yfirburðum

Valsliðið keyrði yfir Selfossliðið í seinni hálfleik og vann að lokum ellefu marka sigur, 36-25.

Valsmenn höfðu ekki spilað frá því þeir sópuðu Framörum í sumarfrí fyrir rúmri viku en Selfossliðið var að koma úr tvíframlengdum oddaleik á móti FH á fimmtudaginn var. Þetta átti örugglega sinn þátt í því að Valsmenn unnu seinni hálfleikinn með níu marka mun, 20-11.

Í lokin munaði ellefu mörkum á liðunum og Valsmenn settu með þessu met því ekkert lið hefur unnið stærri sigur í fyrsta leik í undanúrslitum í sögu úrslitakeppninnar.

Valsliðið sló níu ára gamalt met FH-inga frá árinu 2013 en FH vann þá 9 marka sigur, 36-27. Það fylgir þó sögunni að Framarar unnu næstu þrjá leiki og slógu FH-inga út. Framliðið fór síðan alla leið og vann Íslandsmeistarartitilinn eftir 3-1 sigur á Haukum í lokaúrslitum.

Valsmenn hafa verið illviðráðanlegir í þessari úrslitakeppni en þeir eru búnir að vinna þrjá fyrstu leiki sína og það með 8,7 mörkum að meðaltali í leik. Valsmenn unnu leikina á móti Fram í átta liða úrslitunum með samtals fimmtán marka mun.

Hér fyrir neðan má mestu yfirburði í fyrsta leik í undanúrslitum karla í handbolta.